Мулоқоти раиси КМИР бо роҳбари ҳайати мушоҳидони байналмилалӣ аз ИДМ
Душанбе, 19.05.2016 /АМИТ «Ховар»/. Имрӯз дар Комиссияи марказии интихобот ва раъйпурсии Ҷумҳурии Тоҷикистон мулоқоти раиси Комиссия Худоёрзода Бахтиёр Тавар бо Муовини аввали раиси Кумитаи иҷроияи Иттиҳоди Давлатҳои Мустақил-Котиби иҷроияи ИДМ Гаркун Владимир Гилярович, ки роҳбарии ҳайати мушоҳидони байналмилалиро аз Иттиҳоди Давлатҳои Мустақил дар давраи омодагӣ ва баргузории раъйпурсии умумихалқӣ оид ба тағйиру иловаҳо ба Конститутсияи (Сарқонуни) Ҷумҳурии Тоҷикистон ба уҳда дорад, баргузор гардид.
Раиси Комиссияи марказии интихобот ва раъйпурсии Ҷумҳурии Тоҷикистон Худоёрзода Бахтиёр Тавар меҳмони олимақомро ба Тоҷикистон хайрамақдам гуфта, бо масъалаҳои муҳими омодагӣ ба баргузории раъйпурсии умумихалқӣ, ки 22 майи соли 2016 баргузор мегардад, ошно намуд.
Роҳбари ҳайати мушоҳидони байналмилалии Иттиҳоди Давлатҳои Мустақил Гаркун Владимир Гилярович дар навбати худ оид ба ҷараёни кори мушоҳидони байналмилалӣ сухан гуфта, иброз дошт, ки ҳайати мушоҳидони байналмилалии ИДМ иборат аз 107 нафар хулосаи худро аз рӯи натиҷаҳои мушоҳидаи ҷараёни омодагӣ ва баргузории раъйпурсии умумихалқӣ рӯзи 23 майи соли равон пешниҳод менамояд.
Дар мулоқот ҷонибҳо изҳори боварӣ намуданд, ки раъйпурсии умумихалқӣ оид ба тағйиру иловаҳо ба Конститутсияи (Сарқонуни) Ҷумҳурии Тоҷикистон бо риояи қонунгузории амалкунандаи Ҷумҳурии Тоҷикистон ва санадҳои байналмилалӣ дар фазои орому осуда баргузор мегардад ва ба рушду нумӯи минбаъдаи Ҷумҳурии Тоҷикистон мусоид менамояд.
Бояд гуфт, ки ҷиҳати таъмини шаффофият ва мушоҳидаи ошкорои давраи омодагӣ ва баргузории раъйпурсии умумихалқӣ Комиссияи марказии интихобот ва раъйпурсии Ҷумҳурии Тоҷикистон беш аз 120 нафар мушоҳиди байналмилалиро аз Созмони ҳамкории Шанхай, Иттиҳоди Давлатҳои Мустақил, Ассамблеяи байнипарлумонии Иттиҳоди Давлатҳои Мустақил ва корпуси дипломатии давлатҳои хориҷии муқими Тоҷикистон аккредитатсия намудааст. Инчунин ҷараёни омодагӣ ва баргузории ин маъракаи сиёсиро зиёда аз 320 нафар намояндагони воситаҳои ахбори оммаи ватаниву хориҷӣ инъикос менамоянд.
Дар Душанбе марҳилаи дуюми Лоиҳаи «Тавонмандсозии марказҳои матбуотӣ ва ҳамкории онҳо бо ВАО» оғоз ёфт
Дар вилояти Хатлон гардиши савдои хориҷӣ ба 210,2 миллион доллар баробар гардид
Имрӯз дар Тоҷикистон ҳавои тағйирёбанда дар назар аст
Кӯдакону наврасони ноҳияи Шаҳринав ба истироҳат фаро гирифта мешаванд
Дар Хатлон ташаббуси вилоятии «Саҳми ман дар ободии Ватан» доир карда мешавад
Беш аз 5 ҳазор ҳолати вайронкунии қонунгузории замин дар маҳал бартараф карда шуд
Имрӯз ҳаво дар шаҳри Душанбе то 38 дараҷа гарм мешавад
Дар Бадахшон ҳаҷми маҷмӯи маҳсулоти минтақавӣ 873 миллион сомониро ташкил дод
Кишоварзони Кӯлоб аввалин маротиба зери плёнка чигит кишт намуданд
Имрӯз дар ноҳияҳои алоҳидаи Тоҷикистон чангу ғубор боқӣ мемонад
РУШДИ САЙЁҲӢ. Таърих, фарҳанг, табиат ва меҳмоннавозии мардум вилояти Суғд сайёҳонро бештар ба худ ҷалб намудааст
Дар истироҳатгоҳи омӯзишии «Истиқлол» таътили тобистонаи хонандагон хотирмон мегузарад
