Нопадид шудани ҳавопаймои ширкати «Egypt Air» дар баҳри Миёназамин
Душанбе, 19.05.2016 /АМИТ «Ховар»/. Ҳавопаймои ширкати «Egypt Air»-и Миср, ки аз Париж ба Қоҳира бо хатсайри MS804 парвоз мекард, аз радари танзимгарон нопадид шудааст. Дар ин бора шабакаи телевизионии «Скай Нюс-Арабия» хабар дод.
Бино ба иттилои шабакаи телевизионии «Россия 24», дар борти ҳавопаймои А320 58 мусофир қарор доштанд. Аз рӯи баъзе маълумот, халабонҳо бори охир дар фазои Афина ва бино ба маълумоти дигар, дар ҳарими ҳавоии Туркия ба алоқа баромадаанд.
Вазорати авиатсияи граждании Миср хабар медиҳад, ки гурӯҳҳои ҷустуҷӯӣ-наҷотдиҳӣ аллакай ба ҷустуҷӯи ҳавопаймои гумшуда баромадаанд. Ба ин гурӯҳ ҳайати авиатсияи ҳарбии Миср ва Юнон шомил аст.