«Парӣ аз паси кӯҳи Қоф» — дар шаҳри Гулистон

Гулистон, 26.05.2016. /АМИТ «Ховар»/. Филми нави ҳунарии коргардони телевизиону кинои тоҷик Баҳроми Сайфиддин бо номи «Парӣ аз паси кӯҳи Қоф» дар Кохи Истиқлоли шаҳри Гулистон пешкаши тамошобинон гашт.
Тавре ки ба  хабарнигори АМИТ Ховар масъули хадамоти матбуотии шаҳрдори Гулистон Рустами Одизода хабар дод, филми тозанашр дар деҳаи Вешаби ноҳияи Айнӣ ба навор гирифта шуда, сужаи асосии он аз ишқи софу беолоиши ду навҷавони кўҳистон- Ворису Моҳпарӣ ва ҳамчунин  талоши онҳо ҷиҳати ба соҳили мурод расидан хеле самимиву одӣ ба навор бардошта шуда баёнгари инъикоси воқеии ҳаёти кунунист.  Ҳамчунин  суруду тарона ва рақсҳои ҷолиби миллие, ки дар филм ифода шудаанд,  муҳтавои рӯйдодҳои онро пурра намудаанд.
Тамошои филм бинандаро ба андеша водор сохта, аз содир кардани иштибоҳу ноҷўриҳои рўзгор ва пешгирӣ аз онҳо ҳушдор медиҳад.
Ба иттилои манбаъ, нақшҳои асосиро дар филми мазкур ҳунармандони шинохта Н.Абдуллоев, Г.Абдуллоева, Ф.Абдуллоев, Д.Умарова, К.Ғафуров, Ҷ.Сироҷов, С. Ақназарова, Ф. Холҷонов  ва чандеи дигарон басо моҳирона бозидаанд.