«Рав чархи гардунро бигӯ, Лоиқ видоят карду рафт»-ҳамоиш дар Хатлон

Душанбе, 20.05.2016 /АМИТ «Ховар»/. Ҳамасола 20 май дар саросари ҷумҳурӣ ба шарафи зодрӯзи адиби маъруфи адабиёти муосири тоҷик- Шоири халқии Тоҷикистон шодравон Лоиқ Шералӣ чорабиниҳои илмию адабӣ доир мегарданд.
«Рав чархи гардунро бигӯ, Лоиқ видоят карду рафт»-таҳти чунин унвон  бахшида ба 75- солагии ин шоири зиндаёд дар Китобхонаи оммавии вилояти Хатлон ба номи Шамсиддини Шоҳин ҳамоиши маърифатию фарҳангӣ доир гардид.
Дар маҳфил доираи васеи устодон, адибону олимон, донишҷӯёни Донишгоҳи давлатии Қурғонтеппа ба номи Носири Хусрав, хонандагони фаъоли мактабҳои таълимии шаҳр ва наздикони Лоиқ Шералӣ иштирок намуда, доир ба ҳаёту фаъолияти шоири шаҳири тоҷик  сухан ронданд.
Донишҷӯён ва хонандагон аз осори пурғановати Лоиқ Шералӣ мисраъҳои шеърӣ қироат намуда, ба ҳусни чорабинии маърифатӣ шукӯҳу таровати хосса зам намуданд.