Сафири Русия дар Тоҷикистон кӯшишҳои АНМН-ро мусбат арзёбӣ намуд

Душанбе, 30.05.16. /АМИТ «Ховар»/. 30 май дар Агентии назорати маводи нашъаовари назди Президенти ҶТ вохӯрии Директори агентӣ Шерхон Салимзода бо Сафири Фавқулода ва Мухтори Федератсияи Русия дар Тоҷикистон  И. Лякин-Фролов  баргузор гардид.
Тавре ки ба АМИТ «Ховар» аз маркази матбуоти Агентии зиддимухаддиротӣ хабар доданд, дар вохӯрӣ масъалаҳои вобаста ба идомаи иҷрои «Созишнома байни АНМН ва ХФНМН Русия оид ба расонидани кумак ба агентӣ дар соҳаи назорати воситаҳои нашъаовар, маводи психотропӣ ва прекурсорҳо» мавриди муҳокима қарор гирифт.
Директори агентӣ ба сафир барои дастгирии доимӣ сипосгузорӣ намуда, ба ҳамкории дуҷониба дар соҳаи назорати маводи нашъаовар ва гузаронидани чорабиниҳои зиддимухаддиротӣ баҳои баланд дод.
И. Лякин-Фролов дар ҷавоб самтҳои афзалиятноки ҳамкориро байни Сафорати Федератсияи Русия дар Тоҷикистон ва Агентии назорати маводи нашъаовари назди Президенти Ҷумҳурии Тоҷикистон ишора карда, кӯшишҳои агентиро дар самти мубориза бар зидди гардиши ғайриқонунии маводи нашъаовар мусбат арзёбӣ намуд.