Сафорати Тоҷикистон дар Арабистони Саудӣ сомонаи худро боз намуд

Душанбе, 3.05.2016. /АМИТ Ховар/. Имрӯз Сафорати Ҷумҳурии Тоҷикистон дар Шоҳигарии Арабистони Саудӣ сомонаи худро бо суроғаи «www.tajemb-ksa.org» дар шабакаи ҷаҳонии интернет фаъол намуд.
Сомонаи Сафорати Тоҷикистон дар Шоҳигарии Арабистони Саудӣ аз бахшҳои гуногун иборат буда, бо забонҳои тоҷикӣ ва арабӣ маводи иттилоотию таҳлилӣ ва тарғиботӣ доир ба робитаҳои дӯстӣ ва ҳамкории судманди гуногунҷанбаи ду кишвар, табиати биҳиштосои Тоҷикистон, сарватҳои бебаҳои табиӣ, фазои сармоягузорию сайёҳии кишвар ва таъриху фарҳанги пурғановати тоҷикон паҳн хоҳад кард. Сомона саршор аз маводи хабарию таҳлилӣ, видеоӣ ва аксу мусаввараҳо буда, тамоми сарватҳо ва зебоиҳои табиию фарҳангии Тоҷикистонро ба мардуми Шоҳигарии Арабистони Саудӣ ва дигар кишварҳои арабзабон пешкаш менамояд.
Роҳбарият ва кормандони Сафорати Тоҷикистон дар Шоҳигарии Арабистони Саудӣ умедворанд, ки бо фаъол намудани сомонаи худ дар шабакаи ҷаҳонии интернет метавонанд дар рушди муносибатҳои Тоҷикистон бо ин ва дигар кишварҳои ҷаҳони араб саҳми бештар дошта бошанд.
Хонандагони сомона ҳамчунин метавонанд доир ба таърихи муносибатҳои Тоҷикистону Шоҳигарии Арабистони Саудӣ, фаъолияти сафорати мо дар ин кишвар, кормандони сафорат, масоили консулӣ ва дигар масъалаҳои зарурӣ маълумоти кофӣ пайдо намоянд.