Шумораи қурбониёни се ҳамла дар Бағдод ба 94 нафар расид

Душанбе, 12.05.2016 / АМИТ «Ховар» /. Шумораи қурбониёни се ҳамла дар Бағдод ба 94 нафар расид,- хабар медиҳад рӯзи чоршанбе агентии «Франс Пресс». Пештар дар бораи беш аз 80 ҳалокшуда ва 140 маҷрӯҳ иттилоъ дода шуд.
Шумораи ҷароҳатбардоштагон дар ин ҳамлаи террористӣ, ки масъулияти онро гурӯҳи террористии ба ном «Давлати исломӣ» ба уҳда гирифт, то ба 150 нафар расид.
Силсилатаркишҳо дар пойтахти Ироқ рӯзи чоршанбе сурат гирифтанд. Автомобили бомбагузоришуда субҳ дар бозори минтақаи шианишини Мадинат-ас- Садр таркид, таркиши дуюм дар даромадгоҳи минтақаи Қадимия, дар шимоли Бағдод рух дод.
Бино ба иттилои агентии «Ассошиэйтед Пресс» ҳадафи таркиши дуюм истгоҳи маҳалии пулис буд. Мошини сеюм дар ғарби шаҳр -дар минтақаи суннинишин таркид.