Валентина Матвиенко барои ҳалли мунсифонаи қазияи Хованск мусоидат менамояд

Душанбе, 19.052016/АМИТ Ховар/. Ҳеҷ гуна аъмоли муғризонаи шахсони алоҳида ва ё гурӯҳҳои манфиатҷӯ наметавонанд муносиботи хуби Тоҷикистону Русияро халалдор намоянд. Мо ҳаргиз ба чунин шахсон имкон намедиҳем, ки ҳадафҳои нопоки худро амалӣ намоянд,- гуфт Валентина Матвиенко, Раиси Шӯрои Федератсияи Маҷлиси Федералии Федератсияи Русия дар мулоқот бо Шукурҷон Зуҳуров, Раиси Маҷлиси намояндагони Маҷлиси  Олии Ҷумҳурии Тоҷикистон. Валентина Матвиенко доир ба қазияи оромгоҳи  Ховански шаҳри Маскав, ки дар натиҷаи он се шаҳрванди Тоҷикистон ба ҳалокат расиданд, ба Шукурҷон Зуҳуров ва дар шахси ӯ ба хонаводаҳои қурбоншудаҳо ҳамдардии амиқ баён намуда, аз вуқӯи ин ҳодиса дар қаламрави кишвараш ибрози таассуф кард.
Валентина Матвиенко ба Шукурҷон Зуҳуров иттилоъ дод, ки қазияи мазкурро шахсан зери назорат гирифта, барои ҳалли мунсифонаи он мусоидат менамояд.
Дар мулоқот ҳамкории байнипарлумонии Тоҷикистону Русия, вазъи минтақа ва ҷаҳон матраҳ гардид. Зикр шуд, ки дар  қиболи афзоиши хатарҳои ҷаҳони муосир зарурати таҳкими равобити дуҷониба дар бахши мубориза бар зидди терроризму ифротгароӣ ба миён омадааст.