Виталий Левченко дар дастаи мунтахаби Тоҷикистон ба фаъолият оғоз кард

Душанбе, 27.05.2016 /АМИТ «Ховар»/. Яке аз футболбозони машҳури Тоҷикистон дар охирҳои солҳои рукуди Иттиҳоди Шӯравӣ Виталий Левченко, ки дар Украина зинадгӣ мекунад, ба ҳайси мураббии тайёрии ҷисмонии дастаи мунтахаби Тоҷикистон ба фаъолият оғоз кард.
Виталий Левченко дар шаҳри Ленинобод (Хуҷанди имрӯза) соли 1972 чашм ба олами ҳастӣ кушод ва ҷавониашро дар Тоҷикистон паси сар карда, ҳамчун бозингар дар дастаи «Хуҷанд» номвар шуд ва дар 19- солагиаш ба ҳайати дуввуми клуби машҳури «Динамо»-и Киев шомил гардид. Аз соли 1994 то 2000-ум шарафи дастаи ССКА-ро ҳимоя карда, баъдан ба «Таврия»-и Симферопол гузаштааст.
Левченко давоми панҷ сол дар 9 бозии дастаи мунтахаби Тоҷикистон  иштирок карда, шарафи Тоҷикистонро дар бозиҳои Осиёии соли 1998 ва бозиҳои интихобии Ҷоми ҷаҳон-1998 ҳимоя кардааст.
Баъди анҷом додани карйераи бозингар ба ҳайси мураббӣ ва сармураббӣ дар дастаҳои «Княжа», «Арсенал»,«Десна»,«Еднист» ва тими мунтахаби ҷавонони Украина фаъолият кардааст.
Тавре сармураббии дастаи мунтахаби кишварамон Ҳаким Фузайлов дар суҳбат гуфт: «Ман ба касбияти баланди Виталий Левченко боварӣ дорам ва ӯро хуб мешиносам. Мо дар якҷоягӣ мақсад ва вазифаи дар назди дастаи мунтахаб гузошташударо иҷро хоҳем кард».
Мо дар амалӣ шудани ин мақсадҳо ба мураббиёну дастандаркорони  тими мунтахаби малакат барори кор мехоҳем.