Англия аз идомаи сабқат дар Ҷоми «Аврупо-2016» маҳрум шуд

Душанбе, 30.06.2016 /АМИТ «Ховар»/. Дар доираи рақобатҳои 1/8- ниҳоии Ҷоми «Аврупо-2016» дастаи мунтахаби Исландия тими мунтахаби Англияро аз идомаи рақобат маҳрум сохт. Ин рақобат дар шаҳри Нитса, дар майдони «Алянтс Ривера» доир гардида, бо ҳисоби 2:1 ба фоидаи тими мунтахаби Исландия поён ёфт. Новобаста аз он, ки тими мунтахаби миллии Англия дар 63 фоизи вақти асосии бозӣ тӯбро дар ихтиёри худ дошт, бозиро бар рақиби худ бохт. Голи ягонаи тими мунтахаби Англияро Уэйн Руни дар дақиқаи чоруми бозӣ бо иҷрои зарбаи 11 метра ба дарвозаи дастаи мунтахаби Исландия зад.
Ду дақиқа баъд аз ин гол ҳимоятгари тими мунтахаби Исландия Рангар Сигурдссон дарвозаи Англияро рахна намуда, ҳисобро баробар сохт. Голи дуюми дастаи мунтахаби Исландияро Колбейн Сигторссон дар дақиқаи 18-уми бозӣ ба дарвозаи Англия зад ва ҳамин тариқ, ҳисоб 2:1 то охири бозӣ бетағйир монд.
Ҳамин тариқ дастаи мунтахаби Англия пас аз ин шикаст Ҷоми «Аврупо 2016» оид ба футболро тарк мекунад ва тими мунтахаби Исландия ба марҳилаи чорякниҳоӣ роҳ ёфта, дар ин марҳила 3-юми июл бо тими мунтахаби Фаронса рақобат хоҳад кард.