Аргентина ва Чилӣ дар бозии ниҳоии Ҷоми Амрико-2016

Душанбе,23.06.2016 /АМИТ «Ховар»/. Субҳи имрӯз дар бозии дуввуми нимниҳоӣ барои Ҷоми Амрико-2016 дастаҳои мунтахаби Чилӣ ва Колумбия вориди сабқат шуданд. Бозӣ дар нимаи аввал ниҳоят тезутунд гузашт ва футболбозони Чилӣ дар дақиқаи 7 ва 11 тавассути голҳои задаи Арангис ва Фуэнсалида ба сафи пеш баромаданд. Нимаи аввал бо ҳамин натиҷа ба анҷом расид.
Аз сабаби бад шудани вазъи ҳаво ва борону тӯфон дар Чикаго, ки ин вохӯрӣ дар варзишгоҳи «Солҷер Филд»-и ин шаҳр ҷараён дошт, қисми дуввуми бозӣ 2 соату 30 дақиқа боздошт шуд ва баъди омода кардани майдон дастаҳо вохӯриро идома доданд ва он бо ҳамон натиҷаи нимаи аввал 2:0 ба охир расид. Дастаи мунтахаби Чилӣ, чемпиони феълии Ҷоми Амрико -2015 акнун бо дастаи мунтахаби Аргентина, ки дар бозии нимниҳоӣ аввал бар тими мунтахаби Амрико бо ҳисоби 4:0 пирӯз шуда буд, ба бозии ниҳоӣ, ки 27 июн барпо мегардад, қувва хоҳад озмуд.
Ёдовар бояд шуд, ки соли гузашта маҳз дастаҳои мунтахаби Чилӣ ва Аргентина дар бозии ниҳоӣ бо ҳам вохӯрда буданд ва он вақт дар вақти асосӣ натиҷаи мусовӣ(0:0) ҳосил шуд ва соҳибони майдон- чилигиҳо аз зарбаҳои баъдибозии 11-метра бо натиҷаи 4:1 ғалаба карда, аввалин Ҷоми Амрикоро ба худ ихтисос доданд. Аз тарафи дигар дар ҷараёни бозиҳои Ҷоми Амрико-2016 тимҳои мунтахаби Аргентина ва Чилӣ якҷоя ба гурӯҳи «А» шомил буданд ва Аргентина бо ҳисоби 2:1 дар вохӯрии гурӯҳӣ пирӯз гардид. Акнун дар бозии ҳалкунанда кадом даста ғолиб меояд, интизор мешавем.
Дастаҳои мунтахаби Амрико ва Колумбия 26 июн барои дарёфти медалҳои биринҷӣ бо ҳам рақобат мекунанд.