Баррасии самтҳои асосии омодагии касбии кормандон дар муассисаҳои таҳсилотии политсия дар Арманистон

Душанбе, 10.06.2016 /АМИТ «Ховар»/. Дар шаҳри Еревани Ҷумҳурии Арманистон конфронси илмӣ-амалӣ дар мавзӯи «Самтҳои асосии омодагии касбии кормандон дар муассисаҳои таҳсилотии политсия» ва Спартакиадаи ҳарсола байни мактабҳои олии ҳуқуқии давлатҳо-аъзои Ассотсиатсия аз ҷониби Маҷмааи таҳсилотии политсияи Арманистон баргузор гардид.
Тоҷикистонро дар ин ҳамоиши илмӣ номзади илмҳои ҳуқуқ, полковники милитсия А. Ализода  муаррифӣ намуд.
Дар конфронс намояндагони давлатҳои Федератсияи Русия, Ҷумҳурии Беларус ва Ҷумҳурии Гурҷистон низ ширкат намуданд.
Дар қисми аввали конфронс намояндагони Маҷмааи таҳсилотии политсияи Ҷумҳурии Арманистон оид ба фаъолияти кории муассисаи мазкур маълумот дода, намояндагони дигар давлатҳо доир ба фаъолияти кории муассисаҳои худ сухан гуфтанд.
Дар қисми дуюми конфронс мавзӯъҳои вобаста ба омодагии касбии кормандони мақомоти ҳифзи ҳуқуқ, ба монанди «Асосҳои методологии ба кормандони милитсия омӯзонидани техникаи усулҳои муҳорибавӣ», «Хусусиятҳои гузаронидани машғулиятҳои омодагии ҷисмонӣ ба курсантон» ва «Дархости мубрам оид ба коркарди барномаҳои касбӣ-таълимӣ дар муассисаҳои олии касбӣ» мавриди баррасӣ қарор гирифтанд.
Дар конфронси илмӣ А.Ш. Ализода  дар мавзӯи «Омодагии касбӣ-психологии кормандон ва курсантони Академияи ВКД Тоҷикистон» ҳарф зад.