Бозии ҷавобии дастаи мунтахаби Тоҷикистон ва Бангладеш 7 июн дар шаҳри Дакка мегузарад

Душанбе, 06.06.2016 /АМИТ «Ховар»/.Дастаи мунтахаби Тоҷикистон  барои доир кардани вохӯрии ҷавобии интихобии плей-оффи Ҷоми Осиё- 2019 ба кишвари Бангладеш ҳозир шуд. Сармураббии даста Ҳаким Фузайлов бо худ 20 нафар бозингаронро  ба ин ҷо овард.  Дар рӯзи аввал футболбозони мо тамринҳои худро дар варзишгоҳи коллеҷи шаҳри Дакка ба сомон расониданд. Дар ҳайати дастаи миллипӯшони мо муҳофизатгари тими миллӣ ДавронЭргашев, муаллифи голи чорум дар бозии аввали байни дастаҳои мунтахаби Тоҷикистон ва Бангладеш дар шаҳри Душанбе ҳузур надорад. Ба ҳайати даста инҳо шомил шудаанд:
Дарвозабонҳо: Алишер Додов («Регар-ТадАЗ»), Абдуазиз Маҳкамов («Алай», Қирғизистон);
Муҳофизатгарон: Эраҷ Раҷабов («Хайр»), Далерҷон Тӯхтасунов («Ҳосилот»), Табрези Давлатмир («Барқчӣ»), Сиёвуш Асроров, Аҳтам Назаров (ҳарду аз «Истиқлол»), Манучеҳр Аҳмадов («Хуҷанд»);
Ниммуҳофизатгарон: Умедҷон Шарифов («Вахш»), Амирбек Ҷӯрабоев, Эҳсони Панҷшанбе (ҳарду аз «Барқчӣ»), Фатҳулло Фатҳуллоев, Парвизҷон Умарбоев, Нозим Бобоҷонов, Фаридун Шарифов, Нуриддин Давронов (ҳама аз «Истиқлол»);
Ҳамлагарон: Ҷаҳонгир Эргашев («Динамо», Брест, Беларус), Манучеҳр Ҷалилов, Дилшод Восиев (ҳарду аз «Истиқлол»), Аҳтам Ҳамроқулов («Вахш»).
Ёдрас мешавем, ки дар бозии аввали ин дастаҳо миллипӯшони кишварамон бо натиҷаи 5:0 дар Варзишгоҳи марказии шаҳри Душанбе тими мунтахаби Бангладешро шикаст дода буданд.