Донишгоҳи Осиёи Марказӣ дар ВМКБ аз соли 2017 ба қабули довталабон шурӯъ хоҳад кард

Душанбе, 15.06.2016 /АМИТ «Ховар»/. Масъалаи  фаъолияти Донишгоҳи Осиёи Марказӣ зимни мулоқоти вазири  маориф ва илм Нуриддин Саид бо намояндаи доимии Ташкилоти Оғохон оид ба рушд (AKDN) ва раиси Шўрои иҷроияи Донишгоҳи Осиёи Марказӣ Шамс Кассим Лакха, директори шуъбаи апператсионии Донишгоҳи Осиёи Марказӣ Музаффар Ҷорубов, менеҷери Ташкилоти Оғохон оид ба рушд дар Тоҷикистон Латофат Зуҳурова ва намояндаи ташкилот Давлатқадам Хушқадамов доир гардид, ки дар он иштирокдорон мубодилаи афкор намуданд.
Раиси Шўрои иҷроияи Донишгоҳи Осиёи Марказӣ Шамс Кассим Лакха зикр  намуд, ки соли равон барои 72 нафар донишҷў ба Донишгоҳи Осиёи Марказии Норини Ҷумҳурии Қирғизистон ҷой ҷудо шудааст, ки алъон 160 нафар ҳуҷҷат пешниҳод кардаанд.
Ҳамчунин вазири маориф ва илми ҶТ  Нуриддин Саид иброз дошт, ки ба Донишгоҳи Осиёи Марказӣ, ки дар Вилояти Мухтори Кӯҳистони Бадахшон ифтитоҳ меёбад, пас аз расман ба фаъолият шурўъ намудан донишҷўён метавонанд ҳуҷҷат супоранд.
-Қабл аз қабули донишҷўён бояд сохтмони биноҳои таълимӣ пурра ба анҷом расонида шуда, донишгоҳ аз санҷиши комиссияи ҳукуматӣ ва Хадамоти давлатии назорат дар соҳаи маориф гузарад,-иброз намуд Нуриддин Саид.  -Ҳамчунин донишгоҳро зарур аст, ки донишҷўёнро танҳо дар риштаҳое қабул намояд, ки ба талаботи бозори меҳнати Тоҷикистон ҷавобгў бошанд.
Дар идомаи суҳбат вазир Нуриддин Саид таъкид намуд, донишҷўёне, ки ба Донишгоҳи Осиёи Марказии Норини Ҷумҳурии Қирғизистон қабул мегарданд, тибқи қонунгузории амалкунанда ҳуқуқи аз курси дуюм идома додани таҳсилро дар Донишгоҳи Осиёи Марказӣ дар ВМКБ надоранд, аз ин рў, таҳсилро дар Ҷумҳурии Қирғизистон ба анҷом расонида, соҳиби шаҳодатномаи ҳамон донишгоҳ мегарданд.
Ҳоло корҳои сохтмонии Донишгоҳи Осиёи Марказӣ дар Вилояти Мухтори Кӯҳистони Бадахшон идома дошта, он пас аз қабули комиссияи ҳукуматӣ, гирифтани иҷозатномаи пешбурди фаъолият (литсензия) ва шинохти давлатӣ (аккредитатсия)-и Тоҷикистон аз соли 2017 ба фаъолият шурўъ менамояд.