Файзобод: Ба ивази ҷон ҳам бошад, сулҳу пойдории ватанамонро бояд ҳифз кунем

Файзобод, 25.06.2016 /АМИТ «Ховар»/. Бахшида ба ҷашни Ваҳдати миллӣ роҳбарияти ноҳияи Файзобод бо 99 нафар донишҷӯёне, ки тибқи квотаи президентӣ дар муассисаҳои олии кишвар таҳсил доранд, вохӯрии судманд баргузор намуд.
Дар вохӯрӣ роҳбарияти ноҳия аз мушкилоту муваффақиятҳои донишҷӯён огоҳ гардида, барои ислоҳи мушкилоти ҷойдошта супоришҳои мушаххас дод.
Ҷавонон дар навбати худ барои кумакҳои мунтазами роҳбарияти ноҳия изҳори миннатдорӣ намуда, ваъда доданд, ки таҳсилотро дар донишгоҳҳу донишкадаҳо бо баҳои хубу аъло идома дода, барои ободию шукуфоии кишвар саҳми худро хоҳанд гузошт.
Раиси Суди ноҳияи Файзобод Саидҷон Раҷабов дар маърӯзааш изҳор намуд, ки: «Халқи тоҷикро дар солҳои 1992-1993 манфиатдорони хориҷӣ гумроҳ карда, ба ҷанги бародаркушӣ оварда расониданд. Хушбахтона, тафаккури азалии миллати тоҷик ғалаба кард. Бо шарофати Пешвои миллати тоҷикон, роҳбари хирадмандамон муҳтарам Эмомалӣ Раҳмон мо боз ба ҳам омадем, сарҷамъ шудему сулҳу амнияти кишварро аз нав бунёд кардем. Мо халқи тоҷик хусусан ҷавонони бо нангу номуси кишвар бояд ба ивази ҷон ҳам бошад, сулҳу пойдории ватанамонро ҳифз кунем ва оромию осудагии ватанамонро муқаддас донему ҳифзаш намоем».