Фарҳод Раҳимӣ бо олимони Пажӯҳишгоҳи биологии Помир мулоқот намуд

Хоруғ, 9.06.2016 /АМИТ «Ховар»/. Президенти Академияи илмҳои  Ҷумҳурии Тоҷикистон Фарҳод Раҳимӣ ба мақсади ширкат дар конфронси  «Нақши  Президенти Ҷумҳурии Тоҷикистон дар таҳкими Ваҳдати миллӣ ва ҳифзи дастовардҳои истиқлолияти давлатӣ», ки  10 июн баргузор мегардад, ба шаҳри Хоруғ омад. Зимни ин сафар президенти Академияи улуми ҷумҳурӣ бо олимони Пажӯҳишгоҳи биологии Помир ва ДДХ вохӯрд. Зимни мулоқот Ф.Раҳимӣ иброз намуд, ки бо назардошти мавқеи ҷуғрофию иқлимии ин минтақаи кӯҳистон парвариш ва нашъунамои навъҳои гуногуни рустанию набототро мутобиқ ба талаботи илми муосир роҳандозӣ намуда, дар ин самт корҳои тадқиқотиро вусъат бахшидан зарур аст.
«Ниҳодҳои илмии ҷумҳурӣ қасд доранд, ки Пажӯҳишҳои бостоншиносию геологӣ ва соҳаи зироаткориро дар қаламрави вилоят тавсеа бахшанд. Ташкили омӯзиш оид ба кишти зироат дар ноҳияи баландкӯҳи Мурғоб, насби таҷҳизоти тавлидкунандаи барқ  тавассути боду нурҳои  офтоб, ташкили эксепедитсияи  иктишофию ҷустуҷӯӣ дар шарқи вилоят, омӯзиши ҷойҳои таърихӣ, аз қабили Қалъаи Қаҳқаҳа, Зангибор ва Абрешим  аз корҳои асосӣ дар солҳои наздик ба шумор мераванд»,- илова намуд Ф.Раҳимӣ.