Хушхабар ба дӯстдорони китоб: фурӯши 100 номгӯй китоб бо нархи 50 фоиз арзон

Душанбе, 23.06.2016 /АМИТ «Ховар»/.Ташкилоти бонуфузи «Истиқбол», ки то ба имрӯз 250 номгӯй китобҳои хушсифату рангини бадеиро барои кӯдакон нашр намудааст, ба муносибати 25-солагии Истиқлолияти давлатии Ҷумҳурии Тоҷикистон ва Иди Рамазон зиёда аз 100 номгӯй китоби зебо ва хонданиро бо теъдоди 50 000 бо нархи 50 фоиз арзон ба хонандагони хушзавқи худ пешниҳод менамояд.
Хотиррасон менамоем, ки Ташкилоти «Истиқбол» то ба имрӯз  китобҳои пурмазмуну мусаввирро бо 8 забони дунё, ба теъдоди 1 миллиону 700 000 нусха ба нашр расонидааст.
Инак, хонандагони муҳтарам метавонанд китобҳои бадеии нависандагони шинохтаи тоҷик, аз ҷумла «Гаҳвораҷунбон»-и Латофат, «Дарёи умр»-и Х. Файзуллоев, «Ишқи аввал»-и С. Турсун, «Маҳвора дар гаҳвора»-и Н. Қосим, «Гиряи хирс»-и А. Самад ва зиёда аз 100 номгӯй китобҳои бадеиро бо нархҳои арзон харидорӣ намоянд.
Ба диққати дӯстдорони китоб мерасонем, ки фурӯши китобҳо  20 июни соли 2016 оғоз гардида, дар суроғаи  шаҳри Душанбе,  хиёбони Саъдии Шерозӣ, №16, бинои «Шарқи Озод» ҷойгир аст.