Ифтихори тоҷикони Русия аз истиқлолияту ваҳдати Ватани маҳбуб

Душанбе, 17.06.2016 / АМИТ «Ховар» /. Мағфират Насруллоева, муовини раиси Ҷамъияти тоҷикони Ҷумҳурии Хакасияи ФР, ки дар баробари соҳибкори муваффақ будан маҳорати хуби сарояндагӣ низ дорад, тасмим гирифтааст, ки  бахшида ба рӯзи Ваҳдати миллӣ ва 25-солагии Истиқлолияти давлатии Ҷумҳурии Тоҷикистон албоми нави сурудҳояшро, ки тараннумгари сулҳу дӯстӣ, муҳаббату садоқат ба Ватан ва арзишҳои миллии тоҷикон мебошад, пешкаши ҳаводорони оҳангу таронаҳои ноби тоҷикӣ гардонад.
Мағфират  ният дорад, ки дар рӯзҳои ҷашни ваҳдату истиқлолияти Тоҷикистон дар шаҳрҳои Абакан, Красноярск ва Новосибирск бо таронаҳояш, ки ба Ватану Модар, ишқу муҳаббат ва худшиносӣ бахшида шудаанд, ҳунарнамоӣ карда, хотири ҳаводорони шеъру сурудро дар рӯзҳои таҷлили ин ҷашнҳои миллӣ шод намояд.

Садбарг Боқиева, Абакан, ФР.