Ифтитоҳи маркази хизматрасонии «Амонатбонк» дар ноҳияи Рӯшон

Хоруғ, 23.06. 2016 /АМИТ «Ховар»/. Дар остонаи ҷашни Ваҳдати миллӣ дар ҷамоати ба номи Муъминшо Абдулвосиеви  ноҳияи Рӯшони ВМКБ бинои нави дуошёнаи мутааллиқ ба Бонки давлатии «Амонатбонк»  мавриди баҳрабардорӣ қарор дода шуд. Аз хизматрасонии ин бонк сокинони панҷ деҳоти ин ҷамоат баҳра мебаранд, ки 263 нафарашон бознишаста мебошанд. Ғулом Назиров, яке аз ин бознишастагон гуфт, ки қаблан мо барои гирифтани пули нафақа 30 километр роҳро тай намуда, ба маркази ноҳия мерафтем. Ҳоло бонкро ба пеши дари хонаи мо оварданд, ки аз ин иқдоми хубу муфид мо, пиронсолон хеле миннатдорем ва ба ҳукумати кишвар сипоси худро мерасонем.
Раиси ин ҷамоат Соҳибҷамол Сақиева мегӯяд, ки акнун сокинони деҳот бидуни монеа музди меҳнат, нафақа, маблағҳо аз хориҷи кишвар ва  қарзҳои хурду миёнаро мегиранд. Ин, албатта, ба сатҳу сифати зиндагиашон таъсири мусбат мегузорад. Алъон  39 маркази хизматрасонӣ  ва 9 филиали  Бонки давлатии амонатгузории ҶТ «Амонатбонк» ба бошандагони вилоят хизматҳои гуногуни бонкӣ мерасонанд.