Ҷинояти содирнамудаи Рухшона Азимова ҷомеаро ба изтироб овард

Занону модарони тоҷик дар тӯли таърихи чандинҳазорсолаи халқамон ҳамеша чароғи пурфурӯғи хонавода, манбаи адонашавандаи меҳр, мазҳари ишқу зебоӣ, намоишгари покӣ, намунаи олии меҳрубонӣ ва чашмаи иноят будаанд.

Эмомалӣ Раҳмон

Душанбе, 09.06.2016 /АМИТ «Ховар»/. Воқеан  ҳам занони тоҷик  бо хислатҳои ҳамидаи инсонӣ, аз қабили шарму ҳаё, иффату таҳаммулпазирӣ,  покдоманиву меҳнатдӯстӣ шинохта шудаанд, ки   мояи ифтихори миллати мост. Дастоварди   беназири бонувони тоҷик дар зарфи   25 соли Истиқлолияти давлатӣ дар ҳаёти сиёсиву иҷтимоӣ ва иқтисодии  ҷумҳурӣ  бори дигар  шаҳодати гуфтаҳои болост.
Мутаассифона, вақтҳои охир даст ба ҷиноят задани бархе аз занону духтарони  тоҷик  ба номи поки онҳо иснод оварда, боиси  изтироби ҷомеа  гардидааст. Ин масъала  таваҷҷуҳи ҷиддии масъулинро талаб  намуда, андешидани  тадбирҳои заруриро дар ин самт  тақозо менамояд.
Чуноне ки чанде  пеш бо ҳукми Суд Азимова Рухшона Миралиевнаи 25-сола, истиқоматкунандаи шаҳри Душанбе,  кӯчаи Роҳи Нав,  хонаи 232, ки қаблан се маротиба  суд шудааст,  барои содир намудани ҷинояти навбатӣ ба  муҳлати 25 сол аз озодӣ маҳрум гардид.
Чаро ва чӣ тавр Рухшона Азимова бори аввал ба ҷиноят даст зад?! Чаро ӯ баъди се маротиба суд шудан ҳам ислоҳ нагардид?! Чаро номбурда боз ба сангинтарин ҷиноят- куштор даст зад?! Кадом омилҳо сабаби ба ҷиноят даст задани занону духтарон мегарданд? Бобати пешгирӣ аз ин омилҳои номатлуб кадом тадбирҳои иловагӣ ва судманд андешида мешаванд? Ин суолҳоро барои дарёфти посух пеши масъулини соҳа  мегузорем.
Тавре ки Суди шаҳри Душанбе  муайян намуд,  Азимова Рухшона Миралиевна бо ҳамроҳии маъшуқаш — Юсупов Авзалшоҳ Акбаршоевич, соли таваллудаш 1993, истиқоматкунандаи  шаҳри Душанбе, кӯчаи Фирдавсӣ,  бинои 58, ҳуҷраи 37, ки қаблан суд шудааст, ба сангинтарин ҷиноят-  куштор  даст задаанд.
Рухшона моҳи июли соли 2015 бо Содиқова Тахмина Муқимовна шинос шуда, равобити дӯстӣ пайдо  намуда,    ба хонаи якдигар рафту омад менамоянд.
Дар яке аз ин меҳмониҳо, аввалҳои моҳи августи соли 2015  Рухшона  дар хонаи   Тахмина Содиқова, воқеъ дар  суроғаи ноҳияи Рудакӣ, ҷамоати Чортеппа, деҳаи Очамайлӣ як адад ангуштарини  тиллоии  занонаро, ки ба модари дугонааш тааллуқ доштааст, медуздад ва онро  ба бозори «Корвон»-и шаҳри Душанбе бурда, ба шахсони ба тафтишот номаълум ба маблағи 300 сомонӣ  мефурӯшад.
Сипас  Т.Содиқова  аз дуздидани   ангуштарини модараш аз Р.Азимова гумонбар шуда,  ба назди ӯ омада,  талаб намудааст, ки ангуштаринро баргардонад. Р.Азимова  ба дуздиаш  иқрор шуда, изҳори пушаймонӣ намуда, ба Тахмина  арз намудааст, ки ангуштаринро аллакай фурӯхта, маблағашро сарф намудааст ва  ваъда додааст, ки маблағи онро рӯзҳои наздиктарин бармегардонад.
Дар ин муддат Т.Содиқова якчанд маротиба ба манзили истиқоматии Р.Азимова  омада, маблағи ангуштаринро талаб намуда, таҳдид намудааст, ки ба мақомоти дахлдор оид ба  ҷинояти  содирнамудааш  муроҷиат менамояд.
Р.Азимова аз ин талабҳои қотеъонаи дугонааш ва таҳдидҳои ӯ ба мақомоти дахлдор оид ба  ҷинояти содирнамудааш тарсида, ваъда додааст, ки  то санаи 03.10.2015 сол маблағи ангуштаринро хоҳад дод. Аммо дар асл дар дил   тарҳи  куштани  Тахминаро мекашад.
Дар рӯзи ваъдашуда  Р.Азимова  тахминан соатҳои  3- 4-и  субҳ бо мақсади осон намудани ин ҷинояти қасдонаи худ, маъшуқаш Авзалшоҳ Юсуповро даъват намуда, бо ў маслиҳати пешакӣ намуда, охиронро ба содир намудани ҷинояти вазнин моил намуда, изҳор кардааст, ки агар ўро дӯст дорад, пас ҳамроҳаш  Т.Содиқоваро   кушта, аз ӯ  халос мешаванд.
Т.Содиқова  03.10.2015 сол, тахминан соатҳои 08:00   мувофиқи ваъда  барои гирифтани маблағи ангуштарин ба ҳавлии истиқоматии Р.Азимова  омадааст.
Р.Азимова ба  ваъдааш вафо накарда, ба Тахмина  гуфтааст, ки маблағи пулӣ надорад, ки дар натиҷа   дар байни онҳо ҷанҷол бархостааст ва  дар ҳамин вақт модари Азимова Рухшона — Назарова Нигина Сайвалиевна, ки дар наздашон ҳузур доштааст,  таклиф намудааст, ки  агар розӣ бошад, ангуштарини тиллоии худро бар ивази ангуштарини дуздидаи духтараш медиҳад.  Т.Содиқова  розӣ шуда, ангуштаринро гирифтааст, ки ин рафтори ӯ  қаҳру ғазаби Р.Азимоваро дучанд гардонидааст.
Модари Рухшона  дидааст, ки даъво ҳалли худро ёфтааст, бо онҳо хайру хуш намуда, баромада рафтааст. Т.Содиқова низ баромаданӣ шудааст, ки Р.Азимова  ӯро аз роҳ баргардонида,  хоҳиш кардааст, ки ба дохили ҳуҷраи манзили истиқоматӣ дарояд,  чунки  ба ў кор дорад.
Тахмина аз мақсади ғаразноки  дугонааш ва маъшуқи ӯ  бехабар ба ин таклиф розӣ шуда, вориди ҳуҷра мегардад.
Баъдан Р.Азимова ва А.Юсупов  ба назди Т.Содиқова омада, яку якбора ба ў ҳуҷум намуда, ӯро мавриди лату кӯб қарор дода, ангуштаринро аз дасташ кашида  мегиранд. Р.Азимова    Тахминаро  ба дохили ҳаммомхонаи ҳуҷраи мазкур тела дода,  аз таги тағора корди пешакӣ омоданамудаашро гирифта,  ба гарданаш мезанад. Дар ин маврид А.Юсупов  низ вориди ҳаммомхона гардида, дидааст, ки  Т.Содиқова аллакай оғуштаи хун шуда, дар замин афтидааст. Т.Содиқова  аз ин кирдорҳои  ғайричашмдошти Р.Азимова ва А.Юсупов  сахт тарсида, изҳор намудааст, ки ангуштаринро гиранд, фақат ўро раҳо кунанд, ки ў ҳомиладор аст ва пешниҳод намудааст, ки оид ба  надоштани даъвояш забонхат менависад. Р.Азимова баъди ин суханони Тахмина  қоғазу қалам оварда, забонхати ӯро мегирад, ки  нисбат ба Р.Азимова даъво надорад. Р.Азимова забонхатро гирифта, ба маъшуқаш А.Юсупов  фармудааст,  ки бо корд Т.Содиқовро зада, нақшаи кашидаашонро ба охир расонанд. А.Юсупов кордро аз дасти Р.Азимова гирифта,  ба узвҳои ҳаётан муҳими  бадани Т.Содиқова задааст, ки охирин аз ин зарба аз ҳаракат мондааст.
Баъд аз он Р.Азимова бемамониат ба кофтукови сумкаи дастии ҷабрдида шурўъ намуда,  аз  дохили он  як адад телефони мобилии тамғаи «Самсунг», як адад телефони мобилии тамғаи «Нокиа» ва  дигар ашёи онро  тасарруф намуда, барои халос ёфтан аз ҷавобгарии ҷиноятӣ шиносномаи ҷабрдидаро барои муайян нашудани шахсияташ нобуд сохтанӣ шудаанд, вале бо сабабҳои ба ў вобаста набуда натавонистанд, ки ин қасди ҷинояткоронаи худро то ба охир расонанд.
Сипас Р.Азимова ва А.Юсупов  байни худ маслиҳат намуда, ҷасадро бо матоъ печонида, онро  бардошта  ба кӯча баромада,  таксӣ кироя намуда, ба беморхонаи Маркази тибби шаҳрӣ,  воқеъ дар маҳаллаи якум Советский меоянд.
Р.Азимова ва А.Юсупов ҷасади Т.Содиқоваро ба шўъбаи қабули беморон оварда, ному насабашонро дурӯғ гуфта,  изҳор намудаанд, ки онро аз кўча дарёфт намудаанд ва  баъдан аз беморхона фирор кардаанд. Дар натиҷаи ёрии аввалиндараҷаи тиббӣ аз тарафи духтурони беморхонаи мазкур маълум гардид, ки Т.Содиқова ба хунравии дарунӣ  гирифтор шуда,  аз ҷароҳатҳои бардоштааш  аз ҳуш рафтааст, ӯро таъҷилан ҷарроҳӣ кардаанд, вале ӯ  дар натиҷаи  захмҳои  гирифтааш ба ҳалокат расидааст.
Бо ҳукми Суди шаҳри Душанбе  бо дастрасии моддаи 67 қисмҳои 1,3  Кодекси ҷиноятии  Ҷумҳурии Тоҷикистон барои  маҷмӯи ҷиноятҳо бо роҳи қисман зам кардани ҷазоҳо ба Азимова Рухшона Миралиевна ҷазои ниҳоии маҳрум сохтан аз озодӣ ба муҳлати 25  сол бо адо намудани ҷазо дар муассисаи  ислоҳии дорои низоми умумӣ ва ба Юсупов Авзалшоҳ Акбаршоевич ҷазои ниҳоии маҳрум сохтан аз озодӣ ба муҳлати 26 сол бо адо намудани ҷазо дар муассисаи  ислоҳии дорои низоми сахт таъйин  гардид.