Интиқоли 100 тонна маҳсулоти кишоварзӣ ба ВМКБ

Душанбе, 22.06.2016 /АМИТ «Ховар»/. 11 адад мошини сайёри иттифоқи «Тоҷикматлубот» ҳамарӯза ба сокинони маҳаллаҳои истиқоматии чор ноҳияи Душанбе маҳсулоти кишоварзиро бо нархҳои нисбатан арзон дастрас мекунанд. Тавре ки корманди масъули раёсати иттифоқи «Тоҷикматлубот» Иброҳим Гулов ба АМИТ «Ховар» иттилоъ дод, дар баробари 11 адад мошини сайёр, ҳамчунин дар бозори «Шоҳмансур» ду дӯкони фурӯши маҳсулоти хӯрокворӣ ва кишоварзӣ фаъолият доранд, ки барои муътадил нигоҳ доштани нарх дар фасли тобистон, хусусан дар моҳи шарифи  Рамазон мусоидат мекунанд. Ҳамчунин бахшида ба ҷашни Рӯзи Ваҳдати миллӣ 25-уми июни соли равон дар майдончаи назди бозори Қарияи боло аз тарафи хоҷагиҳои кишоварзии «Тоҷикматлубот»-и ҷумҳуриявӣ фурӯши маҳсулоти кишоварзӣ ба роҳ монда шуда, рӯзҳои 28, 29 ва 30 моҳи равон дар назди бозори навтаъсиси «Пойтахт-90» мошинҳои сайёри «Тоҷикматлубот» барои сокинони пойтахт маҳсулоти талаботи аввалро бо нархи арзон пешниҳод мекунанд.
И.Гулов иттилоъ дод, ки раёсати «Тоҷикматлубот» дар арафаи ҷашни Ваҳдати миллӣ, ки имсол дар шаҳри Хоруғ баргузор мегардад, 52 тонна маҳсулоти хӯрокворӣ ва кишоварзиро ба ВМКБ интиқол дода, ҳоло дар шаҳри Хоруғ фурӯши 38 тонна ва дар ноҳияҳои Ванҷу Дарвоз фурӯши 12 тонна маҳсулоти кишоварзӣ, аз ҷумла сабзавоту меваҷоти барвақтӣ бо нархи арзон идома дорад. Қабл аз ин, аз тарафи раёсати «Тоҷикматлубот» дар ҳаҷми 52 тонна маҳсулоти кишоварзӣ ба ВМКБ дастрас шуда буд.
Хотиррасон бояд шуд, ки Пешвои миллат зимни Паёми имсола ба муносибати фаро расидани моҳи шарифи Рамазон таъкид намуда буд: «Мардуми шарифи мо дар ин моҳи муборак анъанаҳои арзишманди мазҳаби ҳанафиро риоя ва эҳтиром намуда, инсонпарварӣ, таҳаммулгароӣ ва хайрхоҳиро пеша мекунанд».