Иштироки намояндагони ташкилотҳои русиявӣ дар ҷаласаи медиа-клуби «Суғдиён»

Хуҷанд, 18.06.2016. /АМИТ «Ховар»/.  «Ҳамкории иқтисодӣ-тиҷоратии Тоҷикистону Русия ва рушди он»-  чунин буд мавзӯи ҷаласаи 43-юми медиа-клуби «Суғдиён», ки дар  шаҳри Хуҷанд доир гашт. Дар кори ҷаласа, ки он ба баргузории ярмаркаи навбатии байналмилалии тиҷорат «Суғд-2016» -и  Анҷумани соҳибкорону сармоягузорон  рабт шуда буд, як гурӯҳ намояндагони ташкилотҳои русиявӣ низ иштирок намуданд.
Зимни ҷаласа иштирокдорон оид ба масоили ҳамкории дуҷонибаи Русияву Тоҷикистон, ҳамкории иқтисодӣ-тиҷоратии минтақаҳои Русия, хусусан бо минтақаҳои вилояти Суғд, амалишавии лоиҳаҳои дуҷонибаи ҳамкорӣ,  ҳамроҳшавии Ҷумҳурии Тоҷикистон ба АвруОсиё, паҳлӯҳои манфӣ ва мусбати он, таваҷҷуҳи хосаи сокинони минтакаҳои Русия ба содироти меваҷоту хушкмеваи тоҷик ва масъалаву муаммоҳои пешорӯи муҳоҷирони тоҷик сухан гуфтанд.
Ҷонибҳо  оид ба равнақи дӯстиву ҳамкорӣ байни вилоятҳои ду давлат, умеду интизориҳо аз баргузории ярмаркаи байналмилалӣ ва форуми соҳибкорон андешаҳои худро изҳор намуданд.