Марҳалаи аввали Чемпионати Тоҷикистон оид ба футбол байни дастаҳои Лигаи олӣ ба поён мерасад

Душанбе, 17.06.2016 /АМИТ «Ховар»/. Бо бозиҳои даври 8-уми Чемпионати мамлакат байни дастаҳои Лигаи олӣ, ки бинобар иштироки дастаи мунтахаби кишварамон дар бозиҳои плей-оффи Чемпионати Осиё -2019 мавқуф гузошта шуда буд, марҳалаи аввали мусобиқот ба анҷом мерасад. 18 июн «Парвоз» бо «Вахш», «Регар ТадАЗ» бо «Равшан» ва 19 июн «Истиқлол» бо КМВА «Помир», «Хуҷанд» бо «Барқчӣ» ва «Хайр» бо «Ҳосилот» вориди майдон мешаванд.
Вохӯрии марказии даври 8 рақобати байни дастаҳои «Хайр» ва «Ҳосилот» маънидод мешавад, аммо бозии байни дастаҳои «Истиқлол» ва КМВА «Помир» аҳамияташ аз бозии аввал бештар аст ва онро ба қатори бозии марказӣ дохил кардан хато нахоҳад буд, зеро чемпиони мамлакат- «Истиқлол» дар ду бозии охири худ бо «Хайр»-и Ваҳдат ва «Ҳосилот»-и Фархор натиҷаи мусовиро(0:0,1:1) ноил шуд ва КМВА «Помир», ки аз як бозӣ то бозии дигар ба натиҷаҳои барҷаста соҳиб мешавад ва дар зинаи сеюми мусобиқот қарор дорад, метавонад натиҷаи фоҷиабореро дар ин вохӯрӣ аз худ боқӣ гузорад. Баъди анҷом ёфтани ин силсилабозиҳо далелу аснод пайдо хоҳанд шуд.
Доварони вохӯриҳои даври 8 мавқуфгузоштаро ФФТ муайян кард. Хуршед Додобоев(«Истиқлол» бо КМВА «Помир»), Сайвалӣ Турдиев(«Хайр» бо «Ҳосилот»), Насрулло Кабиров(«Парвоз» бо «Вахш»), Баҳром Саъдуллоев(«Регар ТадАЗ» бо «Равшан») ва Хусрави Сиддиқзод(«Хуҷанд» бо «Барқчӣ») бозиҳоро  ҳакамӣ мекунанд.
Оғози бозиҳо соати 18:00.