Натиҷаҳои вохӯриҳои ҷавобии плей-оффи Чемпионати Осиё -2019

Душанбе, 08.06.2016 /АМИТ «Ховар»/. Тавре иттилоъ додем, дирӯз  дар вохӯрии ҷавобии плей-оффи Бозиҳои интихобии Ҷоми Осиё- 2019  дастаи мунтахаби  Тоҷикистон дар варзишгоҳи «Бангбаҳанду»-и шаҳри Дакка дастаи мунтахаби Бангладешро бо натиҷаи 1:0 мағлуб кард . Бозии аввали ин дастаҳо дар шаҳри Душанбе бо ҳисоби 5:0 анҷом ёфта буд.  Ғайр аз бозии мазкур ҳамчунин тими мунтахаби Ҳиндустон бар Лаос 6:1(1:0), Камбоҷа бар Тайбейи Чин 2:0(2:2), Малайзия бар Тимори шарқӣ 3:0(3:0) ва Яман бар Малдив 2:0(2:0) ғолиб омаданд.
Ба ҳамин тартиб, дастаҳои мунтахаби Тоҷикистон, Ҳиндустон, Малайзия, Камбоҷа ва  Яман ба бозиҳои гурӯҳии интихобии Ҷоми Осиё -2019 роҳхат гирифтанд.
5 дастаи дар даври бозиҳои плей-офф ба нокомӣ дучоршуда, барои ба даст овардани роҳхат якҷоя бо тими мунтахаби Бутан 6 сентябр ва 11 октябр дар се ҷуфти бозиҳои плей-офф-1 ширкат меварзанд ва ғолибонашон ба бозиҳои гурӯҳии интихобии Ҷоми Осиё-2019 ҳамроҳ мешаванд.
Ёдрас мешавем, ки дастаҳои мунтахаби Австралия, Арабистони Саудӣ, АМА, Қатар, Чин, Эрон, Ҷопон, Сурия, Таиланд, Ироқ, Кореяи ҷанубӣ ва Узбекистон мустақиман дар бозиҳои ниҳоии Ҷоми Осиё- 2019, ки дар Амороти Мутаҳидаи Араб мегузаранд, иштирок мекунанд.
Дастаҳои мунтахаби Кореяи шимолӣ, Урдун, Уммон, Лубнон, Фаластин, Қирғизистон, Гон-Конг, Туркманистон, Сингапур, Ветнам, Кувайт, Филиппин, Гуам, Баҳрайн, Афғонистон, Тоҷикистон, Ҳиндустон, Малайзия, Камбоҷа, Яман ва Мянма дар бозиҳои гурӯҳии Ҷоми Осиё- 2019 якҷоя бо ғолибони се ҷуфти бозиҳои плей-оффи 1, ҷамъ 24 даста  соли оянда дар 6 гурӯҳи чордастагӣ барои роҳхат гирифтан ба бозиҳои ниҳоӣ мубориза мебаранд.
Дар натиҷа ғолибони гурӯҳ ва соҳибони ҷои дуюм ба қатори 12 дастаи финалист ҳамроҳ мешаванд.