Парлумон ба чор қонуни конститутсионӣ тағйиру иловаҳо ворид менамояд

Душанбе, 20.06.2016/АМИТ «Ховар»/. Беш аз 20 масъала   дар ҷаласаи Шӯрои палатаи поёнии Парлумони мамлакат, ки 20 июн таҳти раёсати Шукурҷон Зуҳуров, Раиси Маҷлиси намояндагон доир гардид, баррасӣ шуд.
Аз ҷумла, аъзои Шӯро чор лоиҳаи қонунҳои конститутсионии Ҷумҳурии Тоҷикистон «Оид ба ворид намудани тағйиру иловаҳо ба Қонуни конститутсионии Ҷумҳурии Тоҷикистон «Дар бораи Маҷлиси Олии Ҷумҳурии Тоҷикистон», «Дар бораи вазъи ҳуқуқии узви Маҷлиси миллӣ ва вакили Маҷлиси намояндагони Маҷлиси Олии Ҷумҳурии Тоҷикистон», «Дар бораи Ҳукумати Ҷумҳурии Тоҷикистон» ва «Дар бораи судҳои Ҷумҳурии Тоҷикистон»-ро муҳокима намуданд.
Инчунин лоиҳаи қонунҳои  Ҷумҳурии Тоҷикистон «Оид ба ворид намудани тағйиру иловаҳо  ба қонуни Ҷумҳурии Тоҷикистон «Дар бораи рӯзҳои ид»,«Дар бораи назорати содирот», «Дар бораи матбуоти даврӣ ва дигар воситаҳои ахбори омма», ворид намудани  тағйиру иловаҳо ба  Кодекси мурофиавии ҷиноятӣ, Кодекси гумрук, Кодекси ҷиноятӣ, Кодекси ҳуқуқвайронкунии маъмурӣ,  Кодекси мурофиаи ҳуқуқвайронкунии маъмурӣ, Кодекси шаҳрсозӣ ва Кодекси оила аз сӯи аъзои Шӯрои палатаи поёнии кишвар баррасӣ гардиданд.
Дар анҷом бархе аз масъалаҳо барои баррасӣ ба кумитаҳои Маҷлиси намояндагон ва баъзеи дигараш барои муҳокима ва қабул ба ҷаласаи навбатии иҷлосияи дуюми Маҷлиси  намояндагон пешниҳод гардиданд.