Пешвои миллат Эмомалӣ Раҳмон: «Сохтмону таҷдиди неругоҳҳои барқӣ имкон дод, ки таъминоти аҳолӣ бо барқ беҳтар гардад»

Душанбе, 21.06.2016 /АМИТ «Ховар»/.   «Дар соҳаи кишоварзӣ тавассути тадбирҳои андешидашуда, аз ҷумла аз худ кардани заминҳои нав, ба гардиши кишоварзӣ ворид намудани заминҳои бекорхобида, беҳтар кардани ҳолати мелиоративии заминҳо, зиёд кардани майдони боғу токзор ва ислоҳоти соҳа, бахусус ҳалли қарзи хоҷагиҳои деҳқонӣ, фаровонии маҳсулоти кишоварзӣ ва ҳифзи амнияти озуқавории мардуми кишвар бамаротиб беҳтар шуд»,-иқтибос аз суханронии Сарвари давлат муҳтарам Эмомалӣ Раҳмон дар ҷаласаи навбатии Шӯрои миллии рушди назди Президенти Ҷумҳурии Тоҷикистон, ки имрӯз баргузор гардид.
Ба таъкиди Пешвои миллат, сохтмону таҷдиди неругоҳҳои барқӣ, маркази барқу гармидиҳӣ, хаттҳои интиқоли неруи барқ ва зеристгоҳҳои барқӣ, инчунин ислоҳот дар соҳаи энергетика имкон дод, ки таъминоти аҳолӣ ба барқ, фаъолияти устувори инфрасохтори энергетикӣ ва содироти барқ ба кишварҳои ҳамсоя дар фасли тобистон ба таври назаррас беҳтар гардад.
Аз ҷумла, бунёди неругоҳҳои барқи обии Сангтӯда-1 ва Сангтӯда-2, навбати якуми Маркази барқу гармидиҳии Душанбе, хаттҳои интиқоли барқи Ҷануб — Шимол, Лолазор — Хатлон ва Хуҷанд — Айнӣ анҷом ёфта, мавриди истифода қарор гирифтанд.