Раиси комиссияи маркази тиббӣ-ҳарбии Вазорати мудофиаи ҶТ ба порагирӣ гумонбар дониста шуд

Душанбе, 23. 06. 16. /АМИТ «Ховар»/.  Кормандони Агентии назорати давлатии молиявӣ ва мубориза бо коррупсияи Ҷумҳурии Тоҷикистон раиси комиссияи маркази тиббӣ-ҳарбии Вазорати мудофиаи Ҷумҳурии Тоҷикистонро барои гирифтани пора дастгир намуданд. Дар ин бора маркази матбуотии Агентии назорати давлатии молиявӣ ва    мубориза бо коррупсияи Ҷумҳурии Тоҷикистон хабар дод.
Ба иттилои манбаъ, дар натиҷаи бурдани корҳои  фаврию ҷустуҷӯӣ аз ҷониби кормандони Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар шаҳри Душанбе муайян карда шуд, ки раиси комиссияи маркази тиббӣ-ҳарбии Вазорати мудофиаи Ҷумҳурии Тоҷикистон, полковники хизмати тиббӣ Сайдалиев Шералӣ Муродович, барои аз хизмати ҳарбӣ бинобар сабаби беморӣ озод намудани шаҳрванд «А», ки ба доираи ваколатҳои мансабии ӯ дохил аст, ба сифати пора маблағи 2000 доллари амрикоӣ талаб намуда, аз ин маблағ моҳи феврали соли 2016, маблағи 10 800 сомонӣ ва 600 доллари амрикоиро ба сифати пора гирифта, боз овардани боқимонда маблағи 3300 сомониро талаб карда истодааст.
11 апрели соли 2016 зимни гузаронидани чорабиниҳои фаврию ҷустуҷӯӣ Сайдалиев Шералӣ Муродович бевосита баъди аз шаҳрванд «А» ба сифати пора гирифтани маблағи 3300 сомонӣ дар утоқи кориаш дастгир карда шуда, далели шайъӣ, яъне маблағи 3300 сомонӣ аз ӯ ёфта гирифта шуд.
Нисбат ба Сайдалиев Шералӣ Муродович бо моддаи 319 қисми 1 КҶ Ҷумҳурии Тоҷикистон парвандаи ҷиноятӣ оғоз карда шуда, тафтишот идома дорад.