Рекорди ҷаҳонии мухлисони Исландия

Душанбе, 30.06.2016 /АМИТ «Ховар»/. Мухлисони дастаи мунтахаби футболи Исландия ҳангоми тамошои бозии 1/8- ниҳоии Ҷоми «Аврупо-2016» бо тими мунтахаби Англия, ки бо ғалабаи исландиҳо(2:1) анҷом ёфт, дар тамошои бозӣ тавассути телевизорҳо рекорди нави ҷаҳонӣ гузоштанд. Вақте  ки бозӣ мустақиман пахш мешуд, 99,8% тамошогарон маҳз ин вохӯриро тамошо кардаанд. Тибқи омор, бинандагони аз 10 то 80- сола, ки 272 000 ё худ 94% аҳолии Исландияро ташкил медиҳанд, ба дастаи мунтахабашон таваҷҷуҳ доштанд ва онро тавассути гузориши телевизионӣ тамошо карданд.
Барои қиёс, бозии ниҳоии Ҷоми Аврупо-2012-ро бо ширкати дастаҳои мунтахаби Испания ва Италия  76% испаниҳо ва 75% итолиёвиҳо тавассути телевизор тамошо карда буданд. Ҳамин гуна рақамҳо дар бозиҳои Ҷоми ҷаҳон низ ба қайд гирифта шудаанд. Вохӯрии финалии соли 2014-ро бо иштироки дастаҳои мунтахаби Олмон ва Аргентина 75% олмониҳо ва 78% аргентинагиҳо тамошо кардаанд.
Тавре мебинем, тафовути нишондоди имсола хеле назаррас аст.