Қӯшунҳои сарҳадӣ убури ғайриқонунии интиқоли маводи мухаддирро пешгирӣ карданд

Душанбе, 01.06.16. /АМИТ «Ховар»/.  Қӯшунҳои сарҳадӣ ва кормандони РКДАМ ҶТ дар вилояти Хатлон дар яке аз минтақаи дидбонгоҳи сарҳадии Отряди сарҳадии «Ҳамадонӣ» дар қитъаи сарҳади Тоҷикистону Афғонистон амалиёт гузаронида,  убури ғайриқонуниро бо кӯшиши интиқоли маводи мухаддир пешгирӣ карданд.
Тавре ки ба АМИТ «Ховар» аз маркази матбуоти қӯшунҳои сарҳадии КДАМ ҶТ хабар доданд, 29 май ҳангоми гузаронидани амалиёт, гурӯҳи мусаллаҳи қочоқчиёни номаълуми афғон иборат аз 6-7 нафар дар вақти убури ғайриқонунии марзи давлатӣ бо сарҳадбонони тоҷик рӯ ба рӯ мешаванд. Ба амри сарҳадбонони тоҷик қочоқчиён итоат накарда, байни сарҳадбонон ва қочоқбарони мусаллаҳи афғон задухӯрди шадиди мусаллаҳона ба вуқӯъ меояд.
Сарҳадбонони тоҷик чусту чолокӣ ва муқовимати шадид нишон доданд, ки дар натиҷа ду нафар аз қочоқчиён захмдор шуда, боқимонда аз торикии шаб истифода бурда, аз тариқи қамишзор ақибнишинӣ намуда, ба тарафи Афғонистон фирор намуданд.
Ҳоло нисбат ба ин ҳодиса аз тарафи кормандони РКДАМ ҶТ дар вилояти Хатлон  тафтишот идома доранд.