Агентии давлатии ҳифзи иҷтимоии аҳолии вилояти Суғд ба зарардидагони офати табиӣ кумак намуд

Душанбе, 7.07.2016 /АМИТ «Ховар»/. Аз тарафи Фонди хайрияи Шуъбаи Агентии давлатии ҳифзи иҷтимоии аҳолии вилояти Суғд ба 18 нафар эҳтиёҷмандон ва ба 45 оилаи зарардидагони офати табиии шаҳри Панҷакент ва ноҳияи Айнӣ ба миқдори 274145,60 сомонӣ кумак расонида шудааст.
Ба иттилои масъулини Шуъбаи Агентии давлатии ҳифзи иҷтимоии аҳолии вилояти Суғд давоми шаш моҳи соли равон аз ҷониби «Фонди хайрия» инчунин ба Шӯрои собиқадорони ҳарбии вилоят кумакҳо расонида шудаанд.
Мавриди зикр аст, ки Фонди хайрияи Шуъбаи Агентии давлатии ҳифзи иҷтимоии аҳолии Мақомоти иҷроияи ҳокимияти давлатии вилоят бо мақсади ҷалби захираҳои иловагии молиявӣ барои ҳаллу фасл намудани масъалаҳои гуногуни иҷтимоӣ, боз ҳам мустаҳкам кардани заминаҳои моддию техникии муассисаҳои аз буҷети вилоят маблағгузоришаванда, дастгирии моддии шаҳрвандони камбизоат, яккаву танҳо, маъюб, собиқадорони ҷангу меҳнат фаъол гардида буд.