Дар Агентии назорати маводи нашъаовар вохӯрии коршиносон дар доираи «Ташаббуси АҚТ» оғоз гардид

Душанбе, 27.07.2016. /АМИТ «Ховар»/. Имрӯз дар Агентии назорати маводи нашъаовари назди Президенти ҶТ вохӯрии коршиносон оид ба муҳокимаи масъалаҳои ташкили чорабиниҳои фаврӣ дар доираи ташаббуси кишварҳои Афғонистон, Қирғизистон ва Тоҷикистон («Ташаббуси АҚТ») оғоз гардид, ки бо дастгирии  «Барномаи минтақавии Раёсати Созмони Милали Муттаҳид оид ба маводи нашъаовар ва ҷинояткорӣ барои Афғонистон ва кишварҳои ҳамсоя» ташкил карда шудааст.
Тавре аз Агентии назорати маводи нашъаовари назди Президенти ҶТ хабар доданд, вохӯрӣ бо суханҳои ифтитоҳии муовини директори Агентӣ Муртазо Ҳайдарзода ва роҳбари Дафтари Раёсати Созмони Милали Муттаҳид оид ба маводи нашъаовар ва ҷинояткорӣ дар Тоҷикистон   Амелия Ханнафорд оғоз гардид.
Дар вохӯрӣ масъалаҳои вазъи нашъамандӣ дар кишварҳои аъзои «Ташаббуси АҚТ», мубориза бар зидди муомилоти ғайриқонунии маводи нашъаовар ва нақшаҳои гузаронидани амалиётҳои муштарак муҳокима мегарданд.