Дар деҳоти Қиблаӣ китобхонаи наву замонавӣ бунёд мегардад

Душанбе, 16.07.16. /АМИТ «Ховар»/. Китобхонаи Ҷамоати деҳоти «Қиблаӣ»-и ноҳияи Рӯдакӣ тасмим гирифтааст, ки барои деҳаҳои дурдасти ҷамоат Китобхонаи сайёр ташкил намояд.
Тавре сомонаи расмии Вазорати фарҳанги ҶТ хабар медиҳад, китобҳо тибқи низоми китобдорӣ ба феҳрист дохил карда шуданд, то хонанда онро зуд дастрас карда тавонад. Дар натиҷаи муроҷиати роҳбарияти ноҳия ва китобхона ба муассисаҳои таълимиву иҷтимоӣ ба китобхона китобҳои нав оварда шудаанд.  Алҳол дар хазинаи китобхона 5472 нусха китоб мавҷуд аст ва шумораи хонандагони фаъол ба 500 нафар мерасад.
Айни замон бинои китобхонаи деҳоти мазкур ҷавобгӯи талабот набуда, толори хониш надорад. Роҳбарияти ноҳия ва Китобхонаи марказии ноҳияи Рӯдакӣ тасмим гирифтааст, ки барои бунёди китобхонаи наву замонавӣ дар деҳоти Қиблаӣ нақшаи сохтмони онро тарҳрезӣ намояд.