Дар мавзеи «Сари Хосор» машқҳои дастаҷамъона ва тамринҳо гузаронида мешаванд

Душанбе, 26.07.2016. /АМИТ «Ховар»/.  18 июли соли равон дар мавзеи  «Сари Хосор»-и ноҳияи Балҷувони вилояти Хатлон бо иштироки варзишгарони машҳур аз тамоми минтақаҳои ҷумҳурӣ оид ба навъҳои варзиши гуштингирӣ, якҳарбаҳои шарқӣ (панкратион) машқҳои дастаҷамъона ва тамринҳо ташкил ва гузаронида мешаванд.
Тавре аз Вазорати корҳои дохилии кишвар хабар доданд, барои машқҳои дастаҷамъона ва тамринҳо мураббиён ва мутахассисони соҳавӣ аз федератсияҳои мухталифи варзишии ҷумҳурӣ, аз қабили гӯштини миллӣ, гӯштини тарзи озод, бокс, муҳорибаҳои омехта ва кикбоксинг ҷалб шуда, дар баробари такмили маҳорати варзишӣ ва омӯзиши усулҳои беҳтарини касбӣ, инчунин дарсҳо дар мавзӯъҳои меҳанпарастӣ, эҳтиром ба арзишҳои миллӣ, пешгирии шомилшавии ҷавонон ба ҳар гуна ҳизбу ҳаракатҳои ифротӣ, тарбия дар рӯҳияи ватандӯстӣ гузаронида мешаванд.
Қобили зикр аст, ки чорабинии мазкур бо ибтикори Федератсияи муҳорибаҳои омехта «Панкратион»-и кишвар, дастгирии Вазорати корҳои дохилии Ҷумҳурии Тоҷикистон ва Кумитаи ҷавон, варзиш ва саёҳии назди Ҳукумати Ҷумҳурии Тоҷикистон роҳандозӣ гардидааст.