Дар Муъминобод сохтмони иншоотҳои бузург идома дорад

Муъминобод, 07.07.2016 /АМИТ «Ховар»/.  Корҳои ободонию созандагӣ дар баробари дигар шаҳру ноҳияҳои кишвар дар ноҳияи Муъминобод низ вусъати тоза пайдо намудааст.
Дар ноҳия сохтмони якчанд иншооти бузург идома дорад, ки бо фармоиш ва маблағгузории Дирексияи сохтмони иншооти ҳукуматии Дастгоҳи иҷроияи Президенти Ҷумҳурии Тоҷикистон амалӣ карда мешаванд. Дар ҳамин замина барқарорсозии осоишгоҳи махсусгардонидашудаи барқарорсозии саломатии  беморон  баъд аз табобати сил идома дошта, корҳои сохтмонии иншоотро ширкатҳо ва сохтмончиёни маҳаллӣ пеш бурда истодаанд. Сохтмончиён ба сифати корҳои сохтмонӣ аҳамияти бештар зоҳир намуда, қисмати зиёди корҳоро ба анҷом расонидаанд. Ба қавли муҳандиси сохтмон Абдулвоҳид Қурбонов баҳри ҷалби бештари сокинон ба ташаккули тарзи ҳаёти солим ва варзиш дар шаҳру ноҳияҳои кишвар толору варзишгоҳҳо мавриди истифода қарор мегиранд ва дар ноҳияи Муъминобод низ сохтмони варзишгоҳи муосир ва ҷавобгӯ ба талаботҳои имрӯза идома дорад. Варзишгоҳи марказии ноҳия барои 7 ҳазору 30 ҷои нишаст буда, корҳои сохтмониро 3 ширкати сохтмонии маҳаллӣ — Ҷамъияти дорои масъулияти маҳдуди «Барқи Кӯлоб», Ҷамъияти дорои  масъулияти маҳдуди  «Қобилҷон  ЛТД», Ҷамъияти дорои  масъулияти маҳдуди «Самар-сн» идома дода истодаанд. Бо фаъол гардидани варзишгоҳи мазкур шароити мусоид барои машқварзии сокинони ноҳия ва гузаронидани мусобиқахои гуногун фароҳам хоҳад омад. Бино ба гуфти масъулони сохтмон, варзишгоҳи марказӣ дар арафаи ҷашни 25-умин солгарди Истиқлолияти давлатии Ҷумҳурии Тоҷикистон ба истифода дода мешавад, осоишгоҳи махсусгардонидашудаи барқарорсозии саломатии беморон баъд аз табобати сил бошад соли 2017 мавриди баҳрабардорӣ қарор хоҳад гирифт.