Иқдоми Пешвои миллат хусусияти инсондӯстона ва раъиятпарварӣ дорад

Душанбе, 05.07.2016/ АМИТ «Ховар»/. Фардо, 6 июл мусулмонони кишвар чун дигар мусулмонони  дунё Иди саиди Фитрро таҷлил менамоянд. Шӯрои уламои Маркази исломии Тоҷикистон иттилоъ медиҳад, ки 6 июл соати 6:30 дақиқа дар тамоми масҷидҳои ҷомеи кишвар намози Иди саиди Фитр баргузор мегардад ва он аз анҷом ёфтани моҳи шарифи Рамазон ва оғози моҳи Шавол шаҳодат медиҳад.
Бояд тазаккур дод, ки кумак расонидан ба ятимону барҷомондагон, маъюбон, инчунин дар рӯзи иди саиди Фитр боздид аз оромгоҳо ва даст ба дуою фотиҳа бардоштан дар сари қабри гузаштагон, аёдати пиронсолон, волидайн, беморону барҷомондагон сила намудани сари ятимон, дар маҷмӯъ хайру эҳсон аз бузургтарин фазилатҳои  Иди саиди Фитр ва умуман моҳи шарифи Рамазон аст.
Бояд тазаккур дод, ки соли равон дар асоси тасмими Шӯрои уламои кишвар ҳаҷми садақаи Фитр 5 сомонӣ муайян шудааст. Инчунин  мувофиқи ҳисоби шаръӣ нисоби закот 17 ҳазору 400 сомонӣ муқаррар гардидааст,  ки  аз он 435 сомонӣ закот дода мешавад. Фидяи савм барои соҳибони узри шаръӣ (шайхи фонӣ) ба миқдори 600 сомонӣ барои 30 рӯз муайян карда шудааст. Ин дар ҳолест, ки тибқи Амри Президенти кишвар Эмомалӣ Раҳмон, ки дирӯз, 4 июл содир гардид,  Пешвои миллат аз мардуми кишвар даъват намуд,  ки фитри рӯзаро  тибқи фармудаҳои шариат танҳо ба ятимон, маъюбон, оилаҳои ниёзманд, бепарастор ва барҷомонда диҳанд. Сарвари давлат ҳамзамон додани фитри рӯзаро аз ҷониби табақаҳои дар боло зикршуда ҷоиз надонист. Ҳамзамон Президенти мамлакат таъкид намудааст, ки додани  фитри рӯза ба рӯҳониён  ва умуман ходимони дин ва афроди сарватманд манъ аст.
Бояд тазаккур дод, ки ин иқдоми  Пешвои миллат Эмомалӣ Раҳмон хусусияти инсондӯстона ва раъиятпарварӣ дошта, амали хайру савобест барои табақаҳои ниёзманди ҷомеа.