Имрӯз дар вилояти Хатлон Форуми соҳибкорони ҷумҳурӣ ва намоишгоҳи молу маҳсулот ифтитоҳ меёбад

Душанбе, 21.07.2016. /АМИТ «Ховар»/. 21 июл Форуми соҳибкорони ҷумҳурӣ ва намоишгоҳи молу маҳсулот аз тарафи мақомоти иҷроияи ҳокимияти давлатии вилояти Хатлон ва шаҳри Кӯлоб, ҳамчунин ташкилотҳои байналмилалии ғайридавлатӣ баргузор мегардад.

Форум бо мақсади рушду нумӯи соҳаи соҳибкорӣ, табодули таҷрибаи тоҷирон ва шароити мусоид фароҳам оварадан барои ҳамкориҳои соҳибкорони ватанӣ ва хориҷӣ мебошад.

Ба Форум соҳибкорон аз кишварҳои хориҷӣ, аз ҷумла Русия, (кишвари Олтой, вилоятҳои Оренбург, Челябинск ва ҷумҳурии Бошқирдистон), вилояти Харкови Украина, вилояти Гомели Белорус ва вилоятҳои Тахор, Қундуз, Балхи Ҷумҳурии Исломии Афғонистон, музофоти Шэнсин, Хэнан ва Уйғури Ҷумҳурии Халқии Хитой, намояндагони тиҷоратии ҷумҳуриҳои Исломии Эрон, Покистон, ҷумҳуриҳои Осиёи Миёна, Япония, Туркия, Озарбойҷон ва Қазоқистон даъват шудаанд.

Ҳамчунин дар Форум намояндагони 25 шаҳру навоҳии вилояти Хатлон ширкат намуда, молу маҳсулоти кишоварзӣ, саноатӣ, ҳунарҳои мардумиро пешкаш менамоянд. Илова бар ин ташкилотҳои давлатию ғайридавлатӣ низ маҳсули корашонро, ки ба соҳаи соҳибкорӣ рабт дорад, ба намоиш мегузоранд.

Аъзои Ассотсиатсияи миллии занҳои соҳибкори Тоҷикистон низ дар ин Форум ширкат меварзанд ва молу маҳсулоти худро пешкаш менамоянд.