КФ «Хуҷанд» сармураббиашро иваз кард

Душанбе, 12.07.2016. /АМИТ «Ховар»/. Клуби футболи «Хуҷанд»-и Хуҷанд сармураббии худро пеш аз оғози марҳалаи дуввуми чемпионати мамлакат оид ба футбол дар Лигаи олӣ иваз намуд. Минбаъд ин дастаро Ҳомид Каримов тамрин медиҳад.
Тавре директори КФ «Хуҷанд» Акбар Иброҳимов ба АМИТ «Ховар» иттилоъ дод, Ҳомид Каримов расман дирӯз бо ҳайати даста шинос шуда, ба фаъолият оғоз кард.
Ҳомид Каримов пештар ба ҳайси сармураббии дастаи «Парвоз»-и ноҳияи Бобоҷон Ғафуровро машқ дода, солҳои ахир ба ҳайати мураббиёни КМВА «Помир» шомил буд.
Тавре Акбар Иброҳимов директори КФ «Хуҷанд» иттилоъ дод, бо маслиҳати тарафайн шартномаи Нӯъмон Юсупов, сармураббии собиқи КФ «Хуҷанд» ва ёвари ӯ Қаноат Латифов бо даста қатъ гардид. Нӯъмон Юсупов соли сеюм аст, ки дар дастаи «Хуҷанд ба ҳайси сармураббӣ кору фаъолият карда, соли гузашта «Хуҷанд»-ро барандаи медалҳои нуқраи Чемпионати Тоҷикистон гардонида буд.