КМИР узви тозаинтихобгардидаи ММ-ро ба қайд гирифт

 Душанбе, 18.07.2016. /АМИТ «Ховар»/.  Комиссияи марказии интихобот ва раъйпурсии Ҷумҳурии Тоҷикистон узви нави Маҷлиси миллиро ба қайд гирифт, ки он  Ҷӯразода Ҷамшед  Ҳабибулло,  ректори Донишгоҳи давлатии ҳуқуқ, бизнес ва сиёсати Тоҷикистон мебошад.
Дар ин росто,  дар ҷаласае, ки имрӯз таҳти раёсати Бахтиёр Худоёрзода,  раиси  Комиссияи марказии интихобот ва раъйпурсии Ҷумҳурии Тоҷикистон доир гардид, ваколати узви тозаинтихобгардидаи Маҷлиси миллӣ Ҷамшед Ҷӯразода баррасӣ ва тасдиқ карда шуд.
Бояд тазаккур дод, ки Ҷӯразода Ҷамшед  Ҳабибулло дар интихоботи аъзои Маҷлиси миллии Маҷлиси Олии Ҷумҳурии Тоҷикистон ба ивази аъзои хориҷшуда  аз ҳавзаи интихоботии Суғд №2,  ки дирӯз доир гардид,  аз ҷониби  вакилони маҷлисҳои вакилони халқи вилояти Суғд ва шаҳру ноҳияҳои он аъзои Маҷлиси миллии Маҷлиси Олии Ҷумҳурии Тоҷикистон интихоб шуд.
Қобили зикр аст, ки Ҷамшед Ҷӯразода дар курсии Маҷлиси миллӣ ба ҷои Раҷаббой Аҳмадзодда- собиқ раиси шаҳри Хуҷанд менишинад, зеро ваколати  Р.Аҳмадзодда бинобар ба дигар вазифа гузаштанаш дар нимаи  аввали моҳи май дар иҷлосияи шашуми палатаи болоии Парлумони кишвар пеш аз муҳлат қатъ карда шуд. Собиқ раиси шаҳри Хуҷанд Р.Аҳмадзодда  30 марти соли равон бо Фармони Президенти ҷумҳурӣ раиси Кумитаи давлатии идораи замин ва геодезӣ таъин гардида буд.
Маҷлиси миллӣ, палатаи болоии Парлумони Тоҷикистон, 33  аъзо дошта, 25 нафари он дар иҷлосияҳо тавассути овоздиҳӣ аз ҷониби вакилони Маҷлисҳои халқи Вилояти Мухтори  Кӯҳистони Бадахшон, вилоятҳои Суғду Хатлон, ноҳияҳои тобеи марказ ва шаҳри Душанбе интихоб гардида, 8 нафар аъзои дигари Маҷлиси миллиро Президенти Ҷумҳурии Тоҷикистон Эмомалӣ Раҳмон таъин менамояд.