КВД «Роҳи оҳани Тоҷикистон» барои мизоҷони худ имтиёзҳо пешниҳод мекунад

Душанбе, 26.07.2016. /АМИТ «Ховар»/. «Бо мақсади зиёд намудани ҳаҷми боркашониву мусофирбарӣ аз тарафи КВД «Роҳи оҳани Тоҷикистон» имтиёзҳо пешниҳод карда шуд»,-иброз намуд Усмон Қаландарзода, муовини сардори КВД «Роҳи оҳани Тоҷикистон» имрӯз дар нишасти матбуотӣ.
Усмон Қаландарзода инчунин илова намуд, ки ба тоҷирону соҳибкорон ва кишоварзони ватанӣ барои кашонидани маҳсулоти зудвайроншавандаи кишоварзӣ аз 20 то 50 % тахфиф дода шуд ва дар шашмоҳаи аввали соли равон ҳаҷми содироти молҳои хоҷагии халқ 304,8 ҳазор тоннаро  ташкил дод.
Боиси тазаккур аст, ки дар асоси созишномаи байни маъмуриятҳои роҳҳои оҳани Тоҷикистон, Қазоқистон ва Русия басташуда ба мусофироне, ки пешакӣ чипта мехаранд, аз 31 то 45 % тахфиф дода мешавад.