Сармураббии нави «Истиқлол» таъин шуд

Душанбе, 13.07.2016 /АМИТ «Ховар»/. Мутахассиси сербиягӣ Никола Лазаревич, ки собиқан дар дастаи «Истиқлол»-и Душанбе ба ҳайси мураббии тарбияи ҷисмонӣ фаъолият кардааст, ба мансаби сармураббии ҷадиди КФ «Истиқлол» таъин гардид. Вай дар ин вазифа Мубин Эргашевро иваз намуд.
Тавре Рустам Ҳакимов сухангӯи «Истиқлол» тавзеҳ дод, бо тавсияи сармураббии нави даста роҳбарияти КФ «Истиқлол» собиқ сармураббии тими «Хуҷанд»-и шаҳри Хуҷанд Нӯъмонҷон Юсуповро, ки ҳафтаи равон аз сармураббигии дастаи «Хуҷанд» озод шуд, ба ҳайси ёвари Никола Лазаревич интихоб кард.
То замоне, ки Никола Лазаревич ба Душанбе меояд, дастаро Нӯъмон Юсупов тамрин медиҳад.
Дар айни ҳол сармураббии тозаинтихоби «Истиқлол» барои ноил шудан ба иҷозатномаи дараҷаи «Pro»  дар Академияи маҳорати мураббигии Иттиҳодияи футболи Русия маҳорат меомӯзад. Дар давраи таҳсил ӯ дар бошишгоҳҳои Аврупо, чун «Атлетико» (Мадрид), «Копенгаген» (Дания), «Зенит» (Санкт-Петербург) ва «Базел» (Швейтсария) таҷриба андӯхтааст.