Театри Данғара 38 намоишномаро рӯи саҳна овардааст

Душанбе. 12.07.2016. /АМИТ «Ховар»/. Фаъолияти Театри ҷумҳуриявии мусиқӣ — драмавии ноҳияи Данғара дар  нимсолаи аввали  соли равон  мавриди баррасии ҳайати эҷодӣ қарор гирифта, натиҷаи он самарабахш арзёбӣ гардид.
Ҳунармандони  театр дар ин давра  дар маҷмӯъ 38 намоишномаро аз  рӯи асарҳои С. Айюбӣ «Лаҳади Абдулаҳад», Ш.Солеҳ «Шулук ва беваҳои террорист», Ҷ.Қуддус «Лаҳзае бо Аллома», А.Файзиев «Саргузашти се бӯзича» дар таҳияи  А.Қодирӣ ва ғайраҳоро  манзури зиёда аз 6 000 тамошобин намудааст.
Ҳамзамон, нахустнамоиши мазҳакаи  «Кампир ёбам дадаҷон?»-и Х.Хурсандов дар таҳияи Р.Одинаев баргузор гардида, асари «Зиндамаргон»и М.Ғойиб дар таҳияи М.Миров ба саҳна гузошта шудааст. Ҳайати эҷодии театр дар ин давра ба шаҳри Душанбе ва ноҳияҳои Фархору  Рӯдакӣ сафари ҳунарӣ намуданд.