Тими мунтахаби ҷавонони то 19-солаи Тоҷикистон ғалабаро аз даст дод

Душанбе, 13.07.2016. /АМИТ «Ховар»/. Дирӯз  дар Варзишгоҳи «Авиатор»-и пойтахт вохӯрии дӯстонаи  тими мунтахаби ҷавонони то 19-солаи Тоҷикистон ва тими мунтахаби то 21-солаи Қирғизистон (тими олимпӣ) баргузор гардид.
Бозӣ хеле ҷолиб сурат гирифт. Дар дақиқаи 12 ҳамлагари тими мунтахаби кишварамон Амирҷон Сафаров ҳисобро боз карда, футболбозони моро ба сафи пеш баровард. Пас аз  шаш дақиқа довари вохӯрӣ Беҳрӯз Муртазоев барои дағал бозӣ кардани муҳофизатгари тими мунтахаби мо дар майдончаи назди дарвоза ҳукми  ҷазои 11 метраро баровард ва онро капитани қирғизҳо Султанбек Мамунов ба самар расонд. Дақиқаи 38 бозӣ барои Худойдод Узоқов бобарор омад ва ӯ хатои дарвозабони меҳмонон Кутман Қодирбековро истифода бурда, аз нав тими моро ба сафи пеш баровард. Нимаи аввал бо ҳисоби 2:1 ба охир расид.
Дар нимаи дуввум баъди иваз шудани  се бозингар дар ҳайати тими мунтахаби ҷавонони Қирғизистон бозии онҳо тағйир ёфт ва  хатои бозингарони моро истифода бурда, Виктор Кёлм натиҷаи баробариро дар вохӯрӣ гузошт.
Дар суҳбат ба АМИТ «Ховар» сармураббии тими мунтахаби ҷавонони то 19-солаи Тоҷикистон Виталий Левченко гуфт: «Бозӣ барои мухлисон писанд омад, аммо афсӯс мехӯрам, ки ду хатогии моро меҳмонон истифода бурда, ба дарвозаи мо ду тӯб заданд. Баъди ин вохӯрӣ мо ҳунарнамоии бозингаронро таҳлилу баррасӣ мекунем, то дар оянда чунин хатогиҳо содир нашаванд».
Ёдрас мешавем, ки тими мунтахаби Тоҷикистон (U-19) 6 -9 август дар мусобиқаи байналмилалии «CAFA Cup U-19», ки дар шаҳри Тошканд мегузарад, ширкат менамояд.