Варзишгарони Тоҷикистон дар бозиҳои байналмилалии «Бачагони Осиё» ҳузур доранд

Душанбе, 7.07.2016 /АМИТ «Ховар»/. Варзишгарони навраси Тоҷикистон ба шумули 20 нафар дар мусобиқоти шашуми байналмилалии варзишии «Бачагони Осиё», ки аз 5 июл  то 17 июли соли 2016 дар шаҳри Якутски Ҷумҳурии Саха (Ёқутистон)-и Русия идома меёбад, ширкат доранд.
Кумитаи миллии олимпии Тоҷикистон иттилоъ медиҳад, ки варзишгари навраси тоҷик дар ин мусобиқот аз рӯи намудҳои варзиши бокс (писарону духтарон), гуштии озод, самбо ва ҷудо бо ҳамтоёни худ аз 45 кишвари аъзои Шӯрои олимпии Осиё  барои ҷоизаҳои мусобиқа талош мекунанд.  Аслан рақобатҳо дар ришатҳои баскетбол, бокс, варзиши сабук, волейбол, гимнастикаи бадеӣ, гуштии озод, камонварӣ, кураш, мас-рестлинг, пауэрлифтинг, самбо, таэквондо ВТФ, тенниси рӯи миз, тирандозӣ, тирандозӣ ба лаъличаҳо, футбол, хапсагай, ҷаҳиши миллии ёқутистонӣ, ҷудо, шашка, шоҳмот, шиноварӣ, ҷамъ 22 намуд, ки ба барномаи бозиҳо дохил шудаанд, гузаронида мешаванд.
Бори аввал Тоҷикистон дар ин бозиҳо бо шумораи хеле зиёди варзишгарон  ширкат меварзад.