Вохӯрии дӯстонаи тими мунтахаби ҷавонони то 19-солаи Тоҷикистон бо дастаи мунтахаби то 21-солаи Қирғизистон

Душанбе, 12.07.2016. /АМИТ «Ховар»/. Имрӯз  дар варзишгоҳи «Авиатор»  вохӯрии дӯстонаи  тими мунтахаби ҷавонони то 19-солаи Тоҷикистон бо дастаи мунтахаби то 21-солаи Қирғизистон (тими олимпӣ) дар соати 18:00 баргузор мешавад. Бо ин мақсад сармураббии дастаи мунтахаби ҷавонони Қирғизистон Валерий Березовский бо 20 нафар бозингар 10 июл ба Душанбе  омаданд.
Футболбозони қирғиз дар ин ҷараён дар варзишгоҳҳои «Политехникум» ва «Авиатор» машқҳои худро ба сомон расониданд. Валерий Березовский ба ҳайати дастааш бозингарони зеринро шомил кардааст:
Дарвозабонҳо: Кутман Кадирбеков («Ала-Тоо»), Арстан Кудайбердиев («Дордой»-2);
Муҳофизатгарон: Данил Сокирченко («Абдиш-Ата»), Георгий Славний («Ала-Тоо»), Мустафа Юсупов («Дордой»-2), Андрей Долженко («Абдиш-Ата»-2), Аманбек Манибеков («Абдиш-Ата»-2), Аскарбек Салиев («Алга»), Владимир Казакбаев («Живое»);
Нимҳимоятгарон: Манас Карипов («Адиш-Ата»), Александр Мишенко (озод), Одилҷон Абдураҳмонов («Алай»), Гамзи Набиев («Алга»), Давлатҷон Баротов («Абдиш-Ата»), Виктор Келм («Кара-Балта»), Кадирбек Шаарбеков («Ала-Тоо»), Азим Азаров («Дордой»-2), Султонбек Момунов («Абдиш-Ата»);
Ҳамлагарон: Роман Ковалев («Кара-Балта»), Элдар Молдожунусов («Абдиш-Ата»).
Футболбозони кишварамон таҳти роҳбарии сармураббии нави худ Виталий Левченко марҳалаи аввали омодагиро ба бозиҳои ниҳоии Чемпионати Осиё-2016, ки тирамоҳ дар Баҳрайн доир мегардад, дар шаҳри Норак ба анҷом мерасонанд. Ин аввалин бозии таҷрибавии дастаи мунтахаб зери роҳбарии мураббиёни нав хоҳад буд. Дар идомаи омодагиҳо дастаи мунтахаби Тоҷикистон (U-19) 6 -9 август дар мусобиқаи байналмилалии «CAFA Cup  U-19», ки дар шаҳри Тошканд баргузор мегардад, ширкат хоҳад намуд.