Ҷаласаи навбатии Шӯрои ҳамоҳангсозӣ оид ба бемории сил дар Душанбе

Душанбе, 17.08.2016 /АМИТ «Ховар»/.  Ҷаласаи  навбатии Шӯрои ҳамоҳангсозӣ оид ба бемории сил бо ташаббуси  Барномаи USAID оид ба мубориза бар зидди бемории сил ва Вазорати тандурустӣ ва ҳифзи иҷтимоии аҳолии Ҷумҳурии Тоҷикистон имрӯз, 17 август дар Душанбе оғоз гардид. Дар ин бора ба АМИТ «Ховар» аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон хабар доданд.
Шӯрои мазкур натиҷаи таҳлили мониторинг ва баҳодиҳӣ оид ба бемории сил дар шаҳру ноҳияҳои ҷумҳурӣ дар доираи амалинамоии нақшаи миллии стратегӣ оид ба ҳимояи аҳолӣ аз бемории сил дар давоми соли 2016-ро баррасӣ менамояд. Намояндагони вазорату идораҳои дахлдор ва мутахассисони силшинос аз шаҳру ноҳияҳои ҷумҳурӣ дар ин ҷаласа ширкат доранд.
Бояд зикр  намуд, ки ин ҷаласа бо дастгирии Барномаи USAID оид ба мубориза бар зидди бемории сил баргузор мегардад. Мақсади Барномаи USAID оид ба мубориза бар зидди бемории сил бо буҷаи 13,2 миллион доллари амрикоӣ, ки барои панҷ сол ба нақша гирифта шудааст, коҳиши сатҳи паҳншавии бемории сил дар Тоҷикистон мебошад. Барнома ба тақвияти коркарди сиёсати миллӣ, беҳтар кардани дастрасии гурӯҳҳои осебпазири аҳолӣ ба ташхис ва табобат, дастгирии низоми кумаки тиббии ба бемор равонашуда, ҳамчунин тақвияти таҳлилгоҳу дигар бахшҳои соҳаи тандурустӣ дар вилоятҳои Суғду Хатлон ва водии Рашт таваҷҷуҳи хос зоҳир менамояд.