Анастасия Тюрина дар гурӯҳи худ ғолиб шуд, вале ба даври баъдӣ роҳ наёфт

Август 13, 2016 08:45

Душанбе, 13.08.2016./АМИТ «Ховар»/. Анастасия Тюрина, узви дастаи мунтахаби олимпии Тоҷикистон, дар мусобиқоти интихобии шиноварӣ бо тарзи озод ба масофаи 50 метр миёни занон аз рӯи барномаи Бозиҳои XXXI тобистонаи олимпӣ дар Рио-де-Жанейрои Бразилия дар гурӯҳи худ ғолиб шуд. Ӯ дар байни ҳашт нафар бо натиҷаи 31,15 сония мақоми аввалро касб кард. Дар ин бора ба АМИТ «Ховар» аз Кумитаи миллии олимпии Тоҷикистон хабар доданд.
Дар мусобиқоти интихобии шиноварӣ ба масофаи 50 метр бо тарзи озод миёни занон 88 нафар шиноварон ширкат доштанд. Анастасия аз 15 нафари онҳо пеш гузашт ва дар ҷойи 73-юм қарор гирифт.
Дар мусобиқоти интихобӣ Пернилле Блюмеи 22-сола аз Дания бо натиҷаи 24,23 сония ҷойи аввалро гирифт. Франческа Ҳалсалли 26-сола аз Британияи Кабир бо натиҷаи 24,26 сония ҷои дуюм ва Александра Ҳерасименияи 31-сола аз Булғория бо натиҷаи 24,42 сония ҷои сеюмро сазовор гардиданд.
Ҳамин тариқ, Анастасия Тюрина ба мисли шиновари дигари тоҷик Олим Қурбонов аз ҳаққи ширкат дар даври баъдии мусобиқот ва идомаи мубориза барои медалҳои олимпӣ маҳрум гашт. Анастасия Тюрина дар ҳайати тими мунтахаби олимпии Тоҷикистон аз ҳама хурдсол буда, 5 сол боз бо шиноварӣ машғул аст. Вай, ки бори аввал дар Бозиҳои олимпӣ иштирок мекунад, 27 сентябри ҳамин сол 15-сола мешавад. Ӯ хонандаи синфи 8-и мактаби миёнаи рақами 28-и Душанбе мебошад. Анастасия дар Чемпионатҳои ҷаҳон дар Доха (Қатар, соли 2014) ва Қазон (Россия, соли 2015) ширкат кардааст. Ӯро Катерина Измайлова, варзишгаре, ки Тоҷикистонро дар Бозиҳои олимпии гузашта дар Лондон муаррифӣ карда буд, машқ медиҳад.
Ҳамин тавр, аз 7 нафар варзишгароне, ки ба ҳайати мунтахаби олимпии Тоҷикистон дохиланд, панҷ нафар – Анвар Юнусов (бокс, вазни то 60 кг), Комроншоҳи Устопириён (дзюдо, вазни то 90 кг), Олим Қурбонов ва Анастасия Тюрина (ҳарду оид ба шиноварӣ ба масофаи 50 метр бо тарзи озод) ва Муҳаммадмурод Абдураҳмонов (дзюдо, вазни беш аз 100 кг) ба нокомӣ дучор шуда, аз медалҳои олимпӣ бенасиб монданд.
Боз ду нафари дигар аз Тоҷикистон — Кристина Пронженко (давидан ба масофаи 200 метр) ва Дилшод Назаров (варзиши сабук, гурзандозӣ) дар мусобиқоти Олимпиадаи Рио ширкат хоҳанд кард.
Муҳаммадшо Абдуллоев, раҳбари дастаи мунтахаби олимпии Тоҷикистон дар Олимпиадаи Рио дар мусоҳиба ба хабанигорон гуфт, “ҳамакнун мо танҳо аз Дилшод Назаров медали олимпиро чашмдорем ва умедворем ин гурзандози пуртаҷриба,ки бори чорум дар Бозиҳои олимпӣ иштирок мекунад, ин дафъа имконияти худро аз даст намедиҳад”.