Дар Душанбе муносибатҳои дуҷонибаи Тоҷикистону Ҷопон баррасӣ шуданд

Душанбе, 05.08.2016. /АМИТ «Ховар»/. Масъалаҳои мубрами муносибатҳои дуҷонибаи Тоҷикистону Ҷопон дирӯз, 4 август зимни мулоқоти муовини аввали вазири корҳои хориҷии Ҷумҳурии Тоҷикистон Низомиддин Зоҳидӣ ва Сафири фавқулода ва мухтори  Ҷопон дар Ҷумҳурии Тоҷикистон Ҳаҷиме Китаока баррасӣ гардиданд.
Тавре аз ВКХ ҶТ ба АМИТ «Ховар» иттилоъ доданд, ҷонибҳо инчунин роҷеъ ба Ҳамоиши дарпешистодаи байналмиллалии сатҳи баланд оид ба ҳадафи шашуми рушди устувор ва вазифаҳои вобаста ба он таҳти унвони «Таъмини дастрасии ҳамагонӣ ба об ва беҳдошт» (Душанбе, 9-11 августи соли 2016), ҳамкории минтақавӣ дар соҳаи идоракунии офатҳои табиӣ ва ҳамкории минбаъда дар доираи Муколамаи Осиёи Марказӣ + Ҷопон табодули назар кардаанд.