Дар Хуҷанд конфронси «Тоҷикистон- ҷавҳари кашфношуда: мушкилот ва дурнамо» доир шуд

Душанбе, 17.08.2016. /АМИТ «Ховар»/. 16 август дар шаҳри Хуҷанд бо ташаббуси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон ва Мақомоти иҷроияи ҳокимияти давлатии вилояти Суғд конфронси миллии сайёҳӣ дар мавзӯи «Тоҷикистон- ҷавҳари кашфношуда: мушкилот ва дурнамо» баргузор гардид.
Роҳҳои ҳалли масъалаҳои сайёҳии минтақаи Суғдро дар ҷараёни кори конфронс масъулини соҳа дар якҷоягӣ бо мақомоти маҳаллӣ ва идораҳои дахлдор баррасӣ намуданд.
Дар конфронс роҳбарият ва намояндагони  ширкатҳои туристӣ, осоишгоҳу меҳмонхонаҳо ва муовинони раисони шаҳру навоҳӣ ширкат карданд. Ба таъкиди муовини раиси вилояти Суғд Назира Ғаффорӣ, барои рушди соҳаи туризм ва ҷалби ҳарчӣ бештари сайёҳони дохилу хориҷ дар вилояти Суғд тадбирҳои судманд андешида мешаванд.
Зикр шуд, ки ҳарчанд Тоҷикистон бо имкониятҳои бузурги соҳаи сайёҳӣ миёни туристон маъруф гардидааст, вале  сифати хизматрасонии соҳаи сайёҳӣ дар иншооти қабулу хизматрсонӣ беҳбудиро тақозо мекунад.