Дар натиҷаи задухӯрди мусаллаҳона дар марзи кишвар ду нафар кочоқчии афғон маҳв карда шуданд

Душанбе, 22.08.2016. /АМИТ «Ховар/. Хизматчиёни ҳарбии қӯшунҳои сарҳадии КДАМ Ҷумҳурии Тоҷикистон дар якҷоягӣ бо кормандони ШКДАМ дар ноҳияи Ҳамадонӣ дар минтақаи дидбонгоҳи сарҳадии «Сайёд»-и ОС Ҳамадонӣ амалиёти махсуси муштарак гузаронида, дар натиҷа убури ғайриқонунии сарҳади давлатӣ аз ҷониби қочоқчиёни афғон ва кӯшиши интиқоли маводи мухаддир ба Ҷумҳурии Тоҷикистон пешгирӣ карда шуд. Тавре ба АМИТ «Ховар  аз маркази матбуоти қӯшунҳои сарҳадии КДАМ ҶТ хабар доданд, дар вақти убури ғайриқонунии марзи давлатӣ қочоқбарони афғон иборат аз 8-9 нафар бо сарҳадбонони тоҷик ва кормандони ШКДАМ ҶТ рӯ ба рӯ шуда, байни онҳо задухӯрди мусаллаҳонаи шадид ба вуқӯъ омад.
Қочоқчиёни афғон ба муқовимати сахти сарҳадбонони тоҷик ва кормандони ШКДАМ тоб оварда натавониста, ба самти Афғонистон фирор намуданд.
Дар натиҷаи задухӯрд як нафар қочоқчӣ захмӣ гардида, аз ҷои ҳодиса як адад яроқи оташфишони АКМ-7,62, 6 адад тирдон бо 180 дона тири қутраш 7,62,  1 адад норинҷаки  РГД-5 мусодира карда шуда, ду ҷасади қочоқчии афғон дарёфт карда шуд.
Муайян карда шуд, ки ҳар ду аъзои гурӯҳи террористии толибон буда, ба яке аз гурӯҳи фаъолони қочоқчии афғон- Турак шомил будаанд.
Ҷасадҳо расман ба намояндагии сарҳадии ҶИА супорида шуданд.
Нисбат ба ҳодисаи мазкур парвандаи ҷиноӣ оғоз гардида, тафтишот идома дорад.