Дар Суғд Озмуни вилоятии «Адрасбофи беҳтарин» баргузор мегардад

Душанбе, 02.08.2016. /АМИТ «Ховар»/. Ба муносибати 25 — солагии Истиқлолияти давлатии Ҷумҳурии Тоҷикистон 3-4 августи соли равон дар маркази вилояти Суғд бо мақсади тарғиби фарҳанги либоси миллӣ, эҳё ва рушди ҳунарҳои мардумӣ, истеҳсоли матои атлас ва адрас, дарёфти беҳтарин ҳунармандони ҳунарҳои дастии адрасбофӣ, бо ҷои кор таъмин намудани занону духтарон Озмуни вилоятии «Адрасбофи беҳтарин» баргузор мегардад.
Дар озмун 40 нафар бонувоне, ки дар давраҳои ноҳиявӣ ва шаҳрӣ  ғолиб шудаанд, аз рӯи шартҳои бофандаи моҳир, сифати беҳтарини адраси дастӣ, нақши беҳтарин, ҳалли тобиш ва обуранги адраси дастӣ ва  адрасбофи  беҳтарин қувваозмоӣ мекунанд.
Тавре аз Хадамоти матбуоти раиси вилояти Суғд иттилоъ доданд, ғолибони озмун бо мукофоти пулӣ ба маблағи аз 1000 то 5 000 сомонӣ қадрдонӣ карда мешаванд.